آفْرُودِيتْ 🦢

الحلقة الثانية و الثمانون 🦢

🔸️حلقة 82
حطيت ويليام من يدي و خذيت نفس طويل...لتو مش مصدقة لي سمعتو منو...و متوقعتش أنو أيان يخبي عليا حاجة هكا بعد لي بيناتنا الكل...تنهدت بقوة و خرجت...وين لقيتو مزال يشرب و المرة هاذي أكثر من قبل...قربت منو شوية و فكيت الكأس من يدو نحكي
أنا:يززي كهو
هز راسو شوية و عدا عينيه على وجهي...يحكي
أركان:فاش تعمل ياخي ؟
أنا:يكفي...أنت باش تضر روحك هكا...ياخي شفت قداش شربت ؟
أركان:إلينااا
ضيقت عينيا مستغربة...خاطرني حسيتو مش قد بعضو وين فهمت أنو فقد وعيو جملة...مديت يدي شوية و حطيتها على جبينو نحكي
أنا:حرارتك مرتفعة...هيا قوم معايا توا لازمك تغسل وجهك
مد يديه زوز...شدني من أجنابي و حط راسو على كرشي يحكي
أركان:خليك معاياا
مديت يدي شوية و عديتها على شعرو من تالي نحكي
أنا:أركاان...أنت مش في وعيك توا
أركان:أنا مانيش شخص سيء كيما هو...مستحيل نتخلى على صغاري و لا عليك إنتي...أما الكل باش يشوفني كيفو خاطرني معرفتش نحمي ولدي
أنا:أركاان...أنت قاعد تهذي تواا...حاول ترجع لوعيك و خليني نعاونك
أركان:أنا جيست منحبش نولي نسخة منو...منحبش نبني عيلة باش ندمرها في الأخير
تنهدت بقوة...خاطرني منجمتش نجبد روحي منو كيما منجمتش نخليه يقوم معايا...غير هكا منحبوش يحكي حاجات يمكن يندم عليها مبعد...خذيت نفس و حطيت يدي لأخرى على خدو نحكي
أنا:قوم معايا توا و باش نحكيو على هذا الكل مبعد
هزلي براسو لا و جبد روحو شوية...غزرلي يحكي
أركان:أمي كانت تقول أنو أنا نسخة منو...أما كان بقات عايشة لتوا...تعرف أنو كلامها مش صحيح...أنا منتخلاش على الناس لي نحبها جملة و منفرقش بين صغاري زادة
أنا:نعررف أنو أنت متعملش هكاا
أركان:أنا بسببو منعرفش كيفاش نستقر في حياتي و لا حتى نبني عيلة كاملة
أنا:مش بالضرورة تكون كيفو...معادش تخمم بالطريقة هاذي...هيا معايا تواا
كبست على يدو و حاولت معاه باش يوقف...هز روحو وقف بالسيف...وصلت معاه لبيت البانو بالسيف و حليت الما...نحكي
أنا:لازمك تغسل وجهك توا و لا تاخو دوش باش تفيق شوية
أركان:باش دوش معايا ؟
أنا:لااا...تاخو دوش وحدك...حتى و مخك غايب متضيعش الفرصة
أركان:أنا نحبك و نحب نكمل حياتي معاك الكل
حاولت نبعد...لقيت روحي محصورة بينو و بين الرخامة بعد ما طاح بثقلو عليا...حطيت يديا على صدرو نحكي
أنا:أركااان...أبعد شوية...أنت قاعد تخنق فياا
أركان:محلاك إلينا...إنتي أجمل بجعة ريتها في حياتي
أنا:وااضح برشااا
أركان:إنتي مجرد حلم كنت نحكيه لولدي...في كل مرة نشوف ملامحك في أحلامي...متنجمش تبعد و تخليني منحبش نضيع مرة أخرى...أنا باش نكون معاك أركان و كهو...صدقني مستحيل نكون كيفو و نحاول نضرك مرة أخرى
غزر لزندي و هو يحكي...مكنتش نعرف أنو هو مجروح من بوه الحقيقي لهدرجة...خاطر ولا مرة تكلم عليه من قبل...كبست على صدرو أكثر...باش نخليه يبعد شوية خاصة بعد ما حسيت بأنفاسو لي ضربت في وجهي و حاول يبوسني...مديت يدي تحت الما و رشيتو بيه...بعد عليا مروهج...خرجت من تحت يدو و وقفت وراه نحكي
أنا:أغسل وجهك تواا
أركان:هكا الرومانسية عندك ؟
أنا:بالله ؟ توا الموقف هذا تشوفو رومانسي ؟ ساعة نذكرك شنية عملت فيا أمس
غسل وجهو من غير ما يرد عليا و تلفت عندي في لحظة يحكي
أركان:ياخي معادش تحبني ؟
عديت عينيا على تفاصيل وجهو...مهما هربت من مشاعري منجمش ننكر حقيقة إني نحبو و محبيتش غيرو و منعرفش نعيش بلاش بيه زادة...قربت منو شوية...نحكي
أنا:لازمك ترقد شوية باش ترتاح
أركان:نرتاح إذا كنت باش ترقد معايا
أنا:ميزيتش توا
قربت منو و شديتو من يدو...خلط عليا من غير حتى كلمة...دخلت معاه للبيت...وين لقيت ويليام فاق و بقى ساكت...قحرلي يحكي
أركان:هو ميسالش ترقد معاه
أنا:تفضل أرقد بجنبو أنت
أركان:باهي...هكا أحسن
جبد روحو مني و قعد على طرف السرير...نزل عليه شوية باسو من جبينو و تبسم يحكي
أركان:روح بابا...محلاه ولدي
دور راسو شوية و هز عينيه في وجهي...يحكي
أركان:حطو غديكا و إيجا ترقد عندي
قربت منو شوية و نزلت عليه...عدلت المخدة تحت راسو نحكي
أنا:لازمك ترقد توا
شدني من يدو و جبدني عندو...وين فقدت توازني في لحظة...غزرلي ندرا كيف يحكي
أركان:خليك معايا فينوسي
قعدت على طرف السرير بجنبو و عديت يدي على خدو نحكي
أنا:إرتاح توا و بعد نحكيو في كلشي...باهي ؟
أركان:أنا نحب نعيش معاك لي تحرمت منو...نحب نعرس بيك و نبني عيلة معااك زادة...أما نخاف الواقع يكون عكس اللي نحب عليه...نخاف نرقد و نفيق و نعمل فيك لي عملو هو في أمي...أنا منحبش نعيش نفس الشي مرة أخرى
بقيت نغزرلو من غير حتى كلمة...خاطرني معرفتش شنية لازمني نقول بعد كلامو...كبس على يدي أكثر و غطس في النوم...كبست على خدو أكثر...و عديت عينيا على تفاصيل وجهو...كنت متأكدة أنو باش يرقد بعد الكمية لي شربها...غزرت لويليام لي حط يديه زوز في فمو...حتى هو نسخة منو بالظبط..من غير لون عينيه تبسمت على الوضع لي أنا فيه خاطر متوقعتش أني باش نظطر نهتم بيه بعد اللي عملو فيا الكل...غير هكا متوقعتش نسمع الكلام هذا الكل منو و لي هو مجروح من بوه لهدرجة...كيما منعرفش شنية صار باش حقدو الإخوة على بعضهم بالطريقة هاذي...خاصة إني ولا مرة ريتهم متفاهمين مع بعضهم...مهما كانت الظروف.