آفْرُودِيتْ 🦢

الحلقة الثانية و التسعون 🦢

🔸️حلقة 92
🔸️إلينا_تحكي:
قعدت على طرف السرير و عديت عينيا على تفاصيل وجهو...وين لقيت روحي نحب نغزرلو و كهو...خاصة بعد اللي صاار...فكرة إني مكنتش باش نشوفو مرة أخرى مزالت توجع فيااا...و رغم خوفي عليه و الحالة لي إحنا فيهاا...أما موجوعة منو عاللخر و مستحيل نجم نسامحو على الخطوة لي عملها من غير ما يخمم فيا و لا في ولدو...هو إختار ثنية كان يعرف أنو الإحتمال الأكبر ماهوش باش يرجع منها و لي هو باش يخليني وراه مرة أخرى...الأفكار تزاحمت داخل مخي و خلاتني ضايعة أكثر...مديت يدي شوية و عديت صوابعي على خدو و على الجرح لي فوق شفايفو...حل عينيه و تبسم يحكي
أركان:فينووسي
أنا:حرارتك هبطت شوية
أركان:قلتلك إني باش نتعافى بسرعة
تبسمت و عديت عينيا على وجهو مرة أخرى من غير حتى كلمة...منعرفش كيفاش باش نتعامل مع وجيعتي منو المرة هاذي...ضيق عينيه يحكي
أركان:لباس يا روحي ؟
أنا:نوح و أيان باش يدخلو يشوفوك تواا
أركان:بااهي...أما جاوبني على سؤالي
أنا:أناا لبااس أركان
جبدت روحي منو في لحظة و حليت الباب...خليتهم دخلو و قعدت على الكرسي...كبست على يديا زوز و تكيت لتالي...مزلت نحس في روحي ضايعة و خايفة في نفس الوقت...و عاجزة حتى باش نتصرف و لا نلومو على اللي صااار...طلعت راسي شوية و غزرت لكاثرين لي قربت مني هي و آنيا و حتى ويليام كان معاهم...وقفت بالوقت و شديتو من عند كاثرين كبست عليه في حضني و خذيت نفس من ريحتو خاطرني مشفتوش من البارح و لا حتى سألت عليه بعد اللي صار...وخرت لتالي و عاودت قعدت...خاطر حسيت انو طاقتي وفات و معنديش قوة باش ناقف على ساقيا أكثر...نحيتلو يديه من فمو و عاودت بستو...ضحك معايا بالوقت...تبسمت و كبست عليه في حضني..غزرت لدكتور لي دخل عندو...خرج أيان و هو وراه يحكي
هو:على أساس كنت في غيبوبة...كيفاش تخرج من الغرفة متاعك مرة أخرى من غير إذني سيد أيان ؟
أيان:حضرة الدكتور...أنا لباااس هكاا
هو:والله التحليلات هي لي باش تقرر إذا أنت لباس و لا لا
أيان:توقعت باش نخرج ليلة
غزرت لدكتور لي حسيتو باش يطرشق...غمزني و عدا يدو على شعر ويليام قبل ما يمشي...غزرلي يحكي
هو:و السيد أركان لازم يرتااح زادة
هزيتلو براسي إيه و غزرت لنوح لي خرج من عندو يحكي
نوح:يحب يشوفك
هو:شنية حكيت توا ؟
نوح:نظن خليها تدخل عندو...خاطر هو بالذات راسو أصح من خوه و يمكن يقوم وحدو
عدا يدو على وجهو و عاود غزرلي...يحكي
هو:مطولش عندو برشاا
هزيتلو براسي باهي و غزرت لنوح لي قرب من آنيا باسها من جبينها و عنقها بالوقت...تبسمت و هزيت روحي وقفت...قربت مني تحكي
كاثرين:تحب تخليه عندي ؟
أنا:أركاان يحب يشوفو
كاثرين:نستنى فيك هوني ملاا
أنا:بااهي
كبست عليه في حضني و دخلت عندو...وين لقيو قاعد و متكي لتالي...تبسم أول ما غزرلي و مدلي يديه بالوقت...يحكي
أركان:إيجاا عند باباا
حطيتو بين يديه...كبس عليه و باسو بالوقت...فرد وقت يشم في ريحتو...وقفو على ساقيه يحكي
أركان:روح بابا...هاك ناشط اليوم
حرك ساقيه و ضحك معاه...فرد وقت حط يديه زوز في فمو...تبسم يحكي
أركان:خفت برشااا من فكرة أنو أنا مانيش باش نشوفو مرة أخرى
بقيت نغزرلهم من غير حتى كلمة...أصلا أنا مش مستوعبة أنو الكابوس هذا وفى و لي إحنا في أماان تواا...هز عينيه في وجهي يحكي
أركان:إيجا عندي
أنا:الدكتور طلب مني نخليك ترتاح...خاطر مزلت تاعب
أركان:بالله ؟ و إنتي من إمتى تسمع الكلام و تنفذو ؟
عديت عينيا على وجهو و كبست على يديا زوز نحكي
أنا:أنت لي لازمك تسمع كلامو و ترتاح و بالنسبة لويليام باش نخلي كاثرين ترجعو للقصر
أركان:خليه هووني معاياا
كبس عليه في حضنو مرة أخرى و عاود باسو...غزرتلو من غير حتى كلمة...خاطرني منعرفش شنوة لازمني نقول في الوضع هذا...حتى أنا نحس في روحي تاعبة عاللخر...قربت منو بعد ما بدا يبكي في حضنو مديت يديا و هزيتو في حضني...بستو من خدو نحكي
أنا:يحب يرضع أكيد
أركان:خليك هووني معاياا
خذيت نفس و قعدت على الفوتاي باش نرضعو...أما جبد روحو مني و بدا يبكي أكثر من قبل...غزرلي يحكي
أركان:شبيه ؟
أنا:منعرفش...يمكن تعود بالبيبرون متاعو...يمكن جابتها كاثرين معاها
كبست عليه و خرجت من الغرفة...قربت من كاثرين نحكي
أنا:كاثرين...ياخي البيبرون متاعو معاك ؟
كاثرين:أكيد...جبت معايا كلشي ممكن يحتاجو
تنهدت براحة و شديتها عليها...فرد وقت غزرتلها نحكي
أنا:مرسي برشاا...على كلشي عملتو معايا و مع ويليام
حطت يدها على خدي و تبسمت...دخلت عندو مرة أخرى و رضعتو...سكت أول ما شد البيبرون متاعو و غفى في نفس الوقت...تبسمت و أنا نغزرلو...حطيت البيبرون من يدي وين غزرلي يحكي
أركان:إيجا عندي
هزيت عينيا في وجهو و حطيت ويليام في وسط الفوتاي...هزيت روحي وقفت و قربت منو..بعد شوية و مدلي يدو...قعدت على طرف السرير بجنبو و حطيت راسي على صدرو...فرد وقت مديت يدي لأخرى لجنبو دوب تحسست الضمادات لي كانت عليه...كان فما إحتمال إني نخسرو و مانيش باش نشوف وجهو و لا نشم ريحتو كيما توا...رغم أنو كلشي وفى...أما مزلت نحس بنفس الخوف لي عشتو ليلة أمس...غمضت عينيا مع يدو لي تغلغلت في وسط شعري...كنت بحاجة إني نحس بالأمان باش نجم نرقد حتى شوية و ننسى كلشي صار معانا حسيت بيه كي باسني من راسي تنهدت بعمق و غفيت من غير ما نخمم في حتى شي آخر.