آفْرُودِيتْ 🦢

الحلقة الخامسة و الثلاثون🧚‍♀️

🔸️حلقة 35
🔸️آنيا_تحكي:
كبست على الكتاب في يدي و دخلت للأصونصير مترددة...منعرفش إذا باش يقبل يشوفني و لا لا غير هكا مخممتش ناخو الإذن من نوح و لا حتى نحكي معاه...أصلا أنا الغالطة خاطرني صدقت اللي عشتو معاه...محسوب أنا اللي طلبت منو يبوسني باش يحكي معايا أكاكا...فقت من سرحتي كي تحل الباب دخلت مترددة...كبست على الكتاب أكثر كي ريتو خرج لصالة غزرت لفرشاة الرسم في يدو...غير الألوان لي لطخت مريولو و يديه...تبسمت نحكي
أنا:مقصدتش إني نزعجك...كأني جيت في وقت غالط
ويليام:توقعت ماكش باش تجي جملة
أنا:كنت في جزيرة باروس مع نوح...رجعت أمس و عرفت منو أنك هوني
ويليام:تفضل
تبسمت و قربت منو شوية...حطيت الكتاب على الطاولة بجنبي و غزرتلو نحكي
أنا:أنت هوني وحدك ؟
ويليام:إلينا في رودس مع أركان
أنا:معناها باش تمشي من هوني مرة أخرى ؟
ويليام:صحيح
غزرتلو من غير حتى كلمة...مد يدو شوية و تبسم يحكي
ويليام:تحب تشوف اللوحة الجديدة متاعي ؟
أنا:أكيد
ويليام:أما ما تمس حتى شي من غير إذني
أنا:واضح
تبسمت و خلطت عليه للبيت لي كان فيها...هزيت عينيا في اللوحة الكبيرة لي كان يرسم فيها...للحظة حسيت روحي مبهورة بيها...خاطر متوقعتش باش تطلع هكا...من المنظر الطبيعي لصورة الغزال و تفاصيلها...تبسمت نحكي
أنا:محلااها
ويليام:ريت الصورة في التلفزة
أنا:كيفاش نجمت تتذكر تفاصيلها ؟
ويليام:المهم أنها عجباتك
أنا:عاللخر
ويليام:إنتي شنية عملت في دروسك ؟
أنا:نوح دخلني لمدرسة خاصة...جوزيف هو أستاذي توا
ويليام:باهي برشا...هكا تتقدم أكثر
أنا:ياخي مزلت مستعد باش تعاوني ؟
ويليام:في أي وقت آنيا
تبسمت و عديت عينيا على باقي اللوحات لي موجودة...جيت باش نحكي ضربت واحد من الألوان طاح عالأرض...غزرتلو مصدومة و نزلت باش نهزو نحكي
أنا:منقصدش لي صار ويليام...من غير ما تتغشش علياا
ويليام:قوم آنياا...تو نمسحو أنا مبعد
هزيت روحي وقفت...غزر ليديا و حط منديل صغير في يدي يحكي
ويليام:إنتي لباس ؟
أنا:منقصدش والله...مع أنك حذرتني بكري ما نمس شي
ويليام:ما صار شي...ماهوش لون مهم...تو نحضرو مرة أخرى
تبسمت و نزلت راسي مع صوت تليفوني...وين لقيت نوح يطلب...خذيت نفس نحكي
أنا:نوح يطلب فيا...نشوفك مبعد ممكن ؟
ويليام:نستنى فيك
تبسمت و خرجت من عندو بالزربة...منعرفش كيفاش وصلت للأصونصير...لدرجة إني نسيت كتابي على الطاولة...نزلت للجناح متاعو...وين لقيتو يستنى فيا في الصالة...ضيق عينيه و قرب مني شوية يحكي
نوح:وين كنت ؟
أنا:عند ويليام
نوح:ويليام ؟
هزيتلو براسي إيه...غزر ليديا لي مزالو ملطخين باللون لي طاح بكري...و هز حاجبو مستغرب يحكي
نوح:شنوة هذا ؟
أنا:وقعت الألوان بالغالط...مكانش قصدي
نوح:آنياا ياخي فقدت عقلك إنتي...كيفاش تطلع عندو وحدك...بلكشي حاول يضرك...إنتي تعرف لي هو ميحبش شكون يقرب للحاجات متاعو
بقيت نتبع في كلامو رغم صياحو عليا و رجعت خصلات شعري لتالي نحكي
أنا:ماهوش متغشش مني
نوح:بالله ؟ و شنية المناسبة ؟
أنا:خاطرنا أصحاب
نوح:لتو تعاود فيها الكلمة هاذي...آنيا شنية حكيت معااك أنا ؟
أنا:تهنى فهمت اللي تحب تقولو و وجودي ماهوش باش يقلقك جملة...و كان تحب نجم نمشي من هوني زادة
نوح:والله واضح برشا قداش فهمت
قحرتلو و تلفت باش نمشي...أما وقفت على صياحو
نوح:مزلت نحككي معاااك
تلفت عندو مرة أخرى و مديت يدي نحك في يدي لأخرى...خاطرني تحسست من الألوان لي مستني قرب مني شوية و قحرلي يحكي
نوح:هاذي آخر مرة تطلع عندو وحدك
أنا:ويليام صديقي و مانيش باش ناخو إذنك كي نحب نشوفو
نوح:الصبر يا ربي...آنيا...أنا مقصدتش لي فهمتو إنتي أمس
أنا:والله أنت لي بستني مش أنا
نوح:نعرف عزيزتي...غير هكا حتى حد ماهو باش يبوسك من غيري أنا و كهو...هذا اللي حبيت نفهمك فيه بكري
أنا:شقصدك ؟
تنهد بالقاوي و كبس على زندي...دخلني لصالدوبان لي في بيتي...حل الماء و حطلي يديا زوز تحتو خاطرني بقيت نحك فيهم من أول ما وصلت...حسيت روحي تفرهدت على قبل...غزرلي من المرايا يحكي
نوح:لباس توا ؟
أنا:هكا أحسن...عيشك
نوح:إحنا مزلنا باش نحكيو
أنا:في شنوة ؟
نوح:في كلشي و أهم حاجة أنك تستوعب الكلام و متفسروش كيما تحب إنتي واضح
أنا:من غير ما تصيح عليا ؟
نوح:باهي...يكفي أنك معادش تتصرف من راسك
أنا:ويليام ماهوش باش يضرني
نوح:والله منعرفش من وين تجيب في الثقة هاذي
أنا:مفهمتكش...أما حبيت اللوحات متاعو عاللخر
عدا يدو على وجهو و نزل راسو مع صوت تليفونو دوب لمحت إسمها...هز عليها و عطاني بظهرو...بقيت واقفة في بلاصتي مستغربة...متوقعتش باش يهز عليها و يخرج زادة...هزيت راسي شوية...غزرت لروحي و خذيت نفس نحكي
أنا:هو حر في تصرفاتو آنيا...فيق على وضعك
خذيت نفس طويل و خرجت...إستغربت أكثر كي سمعت صوت الأصونصير...أصلا ملحقش يقعد و لا يتعشى...هزيت لوسي في يدي و رجعت لبيتي حطيتلها الأكل متاعها و تسطحت في وسط سريري للحظة حسيت أنو أفكاري غمتني و اللي قاعد يصير باش يخليني نخسر روحي أكثر و الأسوء من هذا الكل معنديش حل واضح...منعرفش وين باش نمشي و لا كيفاش نبدا من جديد...كيما منحبش نخمم في إحتمال ظهور إدوارد في حياتي مرة أخرى...يمكن الشي الوحيد لي إكتسبتو هوني و في وجودو معايا هو الأمان لي تحرمت منو في حياتي السابقة.