ပြိုင်ဘက်ကင်းအသန်မာဆုံး သခင်ကြီး

အခန်း ၁ ဒီစနစ်က အမှိုက်ဆန်တယ်

[Unicode]
အခန်း ၁ ဒီစနစ်က အမှိုက်ဆန်တယ်

ဘုန်း!

နီရွှေရွှေအလင်းတန်းတစ်ခု ထိုးထွက်လာသည်နှင့်တပြိုင်နက် လုရှောင်ယန်၏ဒန်ထျန်မှနေပြီး ပေါက်ကွဲသံတစ်သံသည်လဲ တရဆက်ထွက်ပေါ်လာလေသည်။

လုရှောင်ယန် မျက်လုံးများကို ဖွင့်ဟလိုက်ချိန် ခရမ်းရောင်အလင်းတပျက ဖြတ်ပြေးသွားကာ သူ့နှုတ်ခမ်းစွန်းများသည်လဲ ကော့ညွတ်သွားခဲ့သည်။

“ဟ! နောက်ဆုံးတော့ ငါချိုးဖြတ်နိုင်သွားပြီ။ ဂိုဏ်းရဲ့ဆရာသခင်တောင်မှ ဖန်တီးမှုနယ်ပယ်မှာပဲရှိသေးတယ်လို့ကြားထားတယ်၊ ငါကတော့ ပျက်ပြယ်မှုနယ်ပယ်အဆင့်ကို ချိုးဖြတ်ပြီးသွားပြီ။ ဒါဆို ငါက ဒီကောင်းကင်နတ်ဆိုးဂိုဏ်းထဲမှာ အသန်မာဆုံးဖြစ်သွားပြီလို့ ဆိုလိုတာပဲမဟုတ်လား?”

လုရှောင်ယန်သည် မူရင်းနေရပ်သည် ဤကမ္ဘာမှမဟုတ်ပေ။ လွန်ခဲ့သည့်၁၀နှစ်က အင်အားကြီးသူသာ လေးစားခံရသည့် ဤထူးခြားဆန်းကျယ်သည့်ကမ္ဘာကြီးသို့ သူကူးပြောင်းလာခဲ့ခြင်းဖြစ်သည်။ ကူးပြောင်းလာပြီးနောက် သူနှင့်အတူ စနစ်တစ်ခုပါ အတူပါလာကြောင်းသိလိုက်ရသလို ကောင်းကင်နတ်ဆိုးဂိုဏ်း၏ အတွင်းစည်းအကြီးအကဲတစ်ယောက်ဖြစ်နေသေးသည်။

မူလကတော့ သူ သူ့ဘဝရဲ့အထွတ်အထိပ်ကိုရောက်တော့မည်ဟု ထင်ခဲ့မိသည်။

အဆုံးမှာတော့ ဒီစနစ်ကြီးက တစ်ချိန်လုံးအဝိုင်းလည်ပြနေတယ်ဆိုတာ သိလိုက်ရတော့တယ်။

ဆယ်စုနှစ်တစ်ခုကြာခဲ့တာတောင်မှ စနစ်သည် အဝိုင်းလည်လို့မပြီးနိုင်သေးပေ။

ကူကယ်ရာမဲ့စွာဖြင့် လုရှောင်ယန်လဲ သူ့အားသူကိုးရသည့်အဖြစ်သို့ ရောက်သွားလေသည်။

ကုန်လွန်ခဲ့သည့်၁၀နှစ်အတွင်း သူ့အိမ်ကနေ တစ်ကြိမ်တောင်ထွက်မသွားခဲ့ဖူးပေ။ တစ်လျှောက်လုံး သိုသိုသိပ်သိပ်နေ၍ ကျင့်ကြံဆင့်ကိုသာ အမြန်ဆုံးတိုးမြင့်အောင် ကျင့်နေခဲ့သည်။ တစ်ချိန်တည်းမှာပဲ သူ၏ အခင်းအကျင်းပညာ၊ ဆေးလုံးသန့်စင်ခြင်း၊ လက်နက်သန့်စင်ခြင်းနှင့် တခြားသော ကျင့်ကြံခြင်းနှင့်သက်ဆိုင်သည့် တွဲဖက်ကျွမ်းကျင်မှုပညာရပ်များကိုလဲ တိုးတက်စေခဲ့သည်။