ပြိုင်ဘက်ကင်းအသန်မာဆုံး သခင်ကြီး

အခန်း ၅ သိုင်းဘုရင်အဆင့် အခင်းအကျင်း

[Unicode]
အခန်း ၅ သိုင်းဘုရင်အဆင့် အခင်းအကျင်းတည်ဆောက်ခြင်းက ကောင်းကင်နှင့်မြေကြီးတို့ရဲ့စွမ်းအားကို တုန်လှုပ်သွားစေသည်

ယွင်လီကော စိတ်ဝိညာဉ်စွမ်းအားများကို စုပ်ယူနေသည့်နှုန်းသည် မြန်ပြီးရင်းမြန်လာခဲ့သည်။

အဆုံးမှာတော့ ဝိညာဉ်စွမ်းအင်များသည် သတ်မှတ်ချက်တစ်ခုသို့ရောက်သွားကာ ရုတ်တရက်ဆိုလို ယွင်လီကော၏ဒန်ထျန်မှနေပြီး အသံတစ်သံထွက်ပေါ်လာလေ၏။

ထိုအသံသည် ယွင်လီကောတစ်ယောက် ဆရာသခင်နယ်ပယ်၏ပထမအဆင့်သို့ အောင်အောင်မြင်မြင်ချိုးဖြတ်ဝင်ရောက်သွားနိုင်သည့် အဓိပ္ပါယ်ပင်။

“ငါထပ်ပြီးချိုးဖောက်နိုင်သွားပြန်တာပဲ။”

လုရှောင်ယန်သည်တော့ ထိုအချင်းအရာကိုကြည့်ရင်း ဆွံ့အလို့နေလေသည်။

ထိုအချိန်တွင်ပဲ ယွင်လီကော၏မျက်လုံးများ ဖွင့်လာခဲ့သည်။ သူ၏မျက်ဝန်းများသည် တောက်ပသည့်အလင်းလုံးနှစ်ခုလိုများ အေးစက်သည့်အလင်းတန်းများထွက်ပေါ်နေခြင်းကြောင့် လူတိုင်းကို ထိတ်လန့်သွားစေနိုင်လေသည်။

“ဆရာ။”

လုရှောင်ယန်ရောက်နေသည်ကိုမြင်လိုက်သည်နှင့် ယွင်လီကော အလွန်ပျော်ရွှင်သွားလေတော့၏။ ချက်ချင်းဆိုသလို သူမတ်တပ်ထရပ်လိုက်ကာ ထိုကြီးမားသည့်ကျောက်တုံးကြီးပေါ်ကနေ ခုန်ချလိုက်သည်။ ထို့နောက် လုရှောင်ယန်ရှေ့သို့လျှောက်သွားပြီး ချက်ချင်းဒူးထောက်ချလိုက်လေသည်။

“လီကော၊ ဆရာ့ရဲ့ကြင်နာမှုတွေကို ဘယ်တော့မှမမေ့ပါဘူး။”

ယွင်လီကော၏ ရင်ထဲမှစစ်မှန်သည့်စကားလုံးများ ထွက်ပေါ်လို့လာခြင်းဖြစ်သည်။

လုရှောင်ယန်နှင့်မတွေ့ခင်တုန်းကဆို သူလက်စားပြန်ချေနိုင်ဖို့ အိပ်မက်တွေထားရှိခဲ့သော်လည်း ထိုသို့ဖြစ်နိုင်ချေမရှိမှန်းလဲ သူကိုယ်တိုင်သိသည်။

သူ့အကြောတွေက လုံးဝပျက်စီးသွားခဲ့တာမဟုတ်လား။ ထိုအကြောတွေကို သူပြန်လည်ပြုပြင်နိုင်မယ်ဆိုရင်တောင်မှ ဟိုကောင်ကိုလိုက်မှီဖို့မပြောနဲ့ အရင်တုန်းကလို ပင်ကိုစွမ်းရည်မျိုးရှိနိုင်ဖို့တောင် မဖြစ်နိုင်တော့ပေ။