مساء الفل عليكم ....
ضحكت ريم قائله : ايه ...ايه ؟!
ما انا قولتلك هنكتب الكتاب اخر الشهر
هزت ماس راسها قائله : سمعت بس مش ده سؤالي ...مش شايفه انك اخدتي الخطوة دي بسرعه ...يعني انتوا متعرفوش بعض لسه
تنهدت ريم قائله بشجن : واللي عرفته عمل ايه ... بصراحه ياماسه تعرفيه قبل الجواز أو لا مش فارقه مادام مبدأ أنك موافقه تشاركيه حياتك موجود وبصراحه انا ارتحت له جدا
أومات ماس بابتسامه : وانا كمان ...شكله gentle man ولطيف
ضحكت ريم بمشاكسه قائله : فينك ياجاسر تسمع بتقول ايه علي واحد تاني عشان تقتلها ونخلص
ضحكت ماس قائله : انتي بتقولي فيها ...هيقتلني فعلا
نظرت بها ريم بمكر : طيب ايه انتي بقي... ؟!
هزت ماس كتفها بقله حيله : معرفش
قالت ريم وهي تهز راسها : لا انتي عارفه
نظرت لها ماس باستفهام : عارفه ايه ؟!
قالت ريم وهي تنظر إلي ماس : عارفه انك تقدري تروضي جاسر
نظرت لها ماس باستفهام بينما لم تقل ريم تغيير ولكن ترويض .....ترويض لطباعه الصعبه
لتتابع : يعني انتي عارفه طبعه وكمان عارفه ومتاكده أنه بيحبك وعشانك هيعمل اي حاجه بس مش بالعناد
مالت عليها وغمزت بشقاوة : يعني بشويه دلع علي شويه حنيه هتاخدي عنيه ليه بقي مختارة الطريق الصعب
قالت ماس متنهده : عشان نفسي من جواه يكون عارف أنه لازم يتغير شويه عشاني وعشان حياتنا ....انا مش بطلب منه المستحيل... علي الاقل يتحكم في عصبيته اللي وصلتنا اني اخاف حتي اتكلم معاه عشان المشاكل
رفعت ريم حاجبها باستفهام : مكنتيش تعرفي تمتصي غضبه ده ياماس
قالت ماس وهي تهز راسها : جايز كنت هعرف بالدلع والحنيه زي ما قولتلي بس من جوايا هحس اني بلعب بيه وبعامله أنه طفل مش راجل مسؤول
هزت ريم راسها قائله : مش بتلعبي بيه ولا حاجه ...بس بتتعاملي معاه بذكاء الانثي اللي ربنا اداهولك ....
الست هي الاحتواء
قالت ماس باستنكار : وانا مين يحتويني
.....ريم انا مش زعلانه من جاسر علي قد ما انا زعلانه من نفسي اللي مبقتش عارفاها ....انا مبقتش عارفه اقف قصاده ولا اسكت واتنازل ولا اتمسك بحقي
مبقتش بعمل حاجه الا اني اقبل منه اي حاجه عشان نعدي يومنا من غير مشاكل
وانا تعبت ومش عاوزة ارجع اعيش كده ...معنديش استعداد ارجع اعيش معاه وهو زي ما هو مجرد قيد عليا وعلي حياتي اللي المفروض أنه يشاركني فيها مش تكون حكر له
عقدت ريم حاجبيها : عمرك ما كنتي متشائمه
قالت ماس بغصه حلق : عشان ياست منه ... جاسر بيخلص كل حاجه بصوته العالي
قالت ريم بدفاع : حرام انتي ظلماه
هزت ماس راسها : انا كنت بظلم نفسي عشان لما بسكت بيسوق فيها ولما اتكلم بنعمل مشكله وكل ده جه علي اعصابي
وضعت يدها علي بطنها بحزن وقهر : وابني دفع التمن
ربتت ريم علي يدها بحنان : دي أراده ربنا ياماس جاسر حرام يتحمل اللوم كله
قالت ماس بانفعال : ضغط عليا ورفض يديني فرصه أكلمه
تابعو ريم دفاعها : معلش هو غصب عنه اتفاجيء باللي حصل وكمان كانت كذا مشكله بينكم حاصله
استنكرت ماس هاتفه : انتي بتدافعي عنه ليه... انا صاحبتك
قالت ريم بسماحه : وعشان انتي صاحبتي بقولك الكلام ده .... طبعه وانتي عارفاه ...سايسيه شويه
هزت ماس راسها برفض : مش مضطره كل مره اجي علي نفسي
قالت ريم بتوضيح : مقولتش كده بس بقول طالما دخلنا في حيطة سد يبقي الدور عليكي تغيري الطريق .... علي الاقل اديله فرصه
هزت ماس راسها باستنكار : إديته فرص كتير ....غص حلقها وتابعت ::جرحني اوي اما طلقني بالبساطه دي ...كنت مكسورة من اللي حصل ليا وبدل ما يقف جنبي طلقني .....لمعت الدموع في عيونها وتابعت : انا قولتها مره واحده بس وهو مترددش ونفذ ....
انسابت دمعه ساخنه من عيونها وتابعت : كان نفسي ياخدني في حضنه ويقولي متزعليش ....كان نفسي يقولي كل اللي حصل مش هيتكرر ...كان نفسي يفتكر ليا اي لحظه حلوة تخليه يتمسك بيا ويفهم اني كنت مجروحه مش اكتر
قالت ريم بتفهم وهي تربت علي كتفها : حاولي تنسي كل اللي فات ...عشان كل ما تفتكري هتشيلي منه اكتر
قالت ماس بأسي : ولو نسيت تضمني منين أنه ميرجعش يعمل آللي علمه تاني ...نظرت لها وتابعت وهي تمسح دموعها : ياريم جاسر قضيه خسرانه !
عقدت ريم حاجبيها : يعني ايه ؟!
قالت ماس بثبات : يعني انا هتطلق منه !
قراءه ممتعه بقلم رونا فؤاد
ايه رايكم في موقف ماس وكلامها
أنت تقرأ
قيد من ذهب
Roman d'amourتحبه بجنون ولكن اتحب قيوده حتي وان كانت من ذهب...! انه البريق الذي لايقاوم....!! انه القيد الذي نخطو اليه بكامل إرادتنا بينما بريقه اللامع يكون هو كل مايسيطر علينا.... انه القيد الذهبي...! اقتباس..... (هدر بانفعال : انا كدة ياماس ومش هتغير تقبليني...
