قيد من ذهب

اقتباس

نظر لها باستنكار لتبادله النظرات وهي تقول بدفاع :  ايه ياجاسر هو انا قولت حاجة غلط
عربيتك اكيد مش انا اللي بسوقها.... شوف المفتاح انت سبته فين؟!
انفلتت الكلمات الحاده من لسان جاسر :  وانتي لازمتك ايه ؟!
نظرت له ماس بينما احتقن وجهها : لازمتي اني مراتك مش خدامه ياجاسر
داعب الخجل نظرات جاسر ولكنه يكابر لذا ابعد نظره عنها واتجه بحنق الي الإدراج يبحث بها عن مفتاح سيارته ليرفع جسده بعد لحظات ويلتفت إليها بدهشة حينما استمع لصوت ضحكتها

رفع حاجبه بدهشة : 
بتضحكي علي ايه دلوقتي ؟! 
هزت كتفها قائله : بضحك بدل ما نقلبها خناقه علي المفتاح وشويه تقولي القميص مش مكوي والقميص مش مغسول ....
لا ينكر أن حديثها لائم هوي في نفسه لتكمل ماس بصراحه وهي تتتجه ناحيته 
: انا عارفه انك بتتلكك بس انا مش عاوزة اتخانق
رفع حاجبه باستنكار : مجنون انا بتلكك
أومات له بضحكه شقيه : اه
اتسعت عيناه : قصدك اني مجنون
هزت راسها : لا بتتلكك
: ياسلام
أومات لتقف أمامه وتمسك بازرار قميصه تغلقها له وتقول بدلال اذاب شحنات غضبه :  اه وانا بمتص غضبك
داعبت الابتسامه طرف شفتيه : صريحه اوي
هزت كتفها : الف وادور ليه ؟!.....نظرت إلي عيناه وتابعت : مش طايقني بسبب موضوع مي بس زي ما قولتلك....انا مقولتش حاجة لمالك
مش عاوز تصدقني ليه
قال بجديه : مصدقك ياماس
أومات بحكمه لاتعرف من اين هبطت عليها : وانا مصدقه انك مصدقني بس مخنوق من اللي حصل .....جسورتي ياحبيبي ممكن بدل ما تطلع عصبيتك عليا ونتخانق مع بعض... نتفاهم
نظر إلي عيونها بعتاب : من أمتي العقل ده
هزت كتفها : بحاول عشان بحبك
مد يداه إليها قائلا : تعالي
اقتربت منه ليحتضنها بحنان قائلا وهو يقبل جبينها :  وانا بحبك ومش زعلان منك اصلا انا بس مضغوط زي ما انتي قولتي
ضحكت برقه : يبقي هتصالحني
اوما لها وداعب وجنتيها : حاضر لما ارجع
هزت راسها : لا بكرة
نظر لها بتساؤل ممزوج بالعبث : اشمعني ....هي الكنبه مش فاضيه النهارده
ضحكت بخجل : لا ....بس عشان نخرج سوا وتعزمني علي العشا
ضحكك قائلا : بتتشرطي ياماس هانم
قالت وهي تمرر يدها علي ذقنه :  حقي
مش انا زوجه عاقله
اوما لها وقبل وجنتيها : حقك ياجميل طبعا .....ماشي يا ستي .....بس برضه هصالحك لما ارجع
أومات بخجل ليجمع اشياءه ويتجه الي باب الغرفه ولكنه يستدير لها قائلا ::
ماسه
التفتت له : نعم
غمز لها بشقاوة قائلا :  البسي حاجة فوشيا كدة
عقدت حاجبها باستنكار : فوشيا
اوما قائلا بشرح : اه اللون ده اللي شبه البمبي
ضحكت ماس علي وصفه للالوان كمعظم باقي الرجال :  لا ...لا ياجسورة
..انت متقولش الوان خالص مالكش فيها
ضحك قائلا : ماشي يا حبيتي .... ابقي  البسي حاجة علي ذوقك الحلو
ابتسمت له ليغادر عكس ما كان .... عاصفه من السعاده

قراءه ممتعه بقلم رونا فؤاد
ايه رايكم وتوقعاتكم
عاوزين تعرفوا ايه اللي بيحصل مع الابطال الحلوين يلا نحرك الفوت ....٩٨ الف وبس ٩ آلاف عملوا فوت .....خلينا نقرب المسافه علي الاقل للنص عشان البارت ينزل
دمتم سالمين