စစ်ဧကရာဇ် လီကွမ်ရီ Book 1 ( Ch 1 - 990 )

981 - 985

စစ်ဧကရာဇ်(Chapter:981)
(ရီချွမ်တို့အဖွဲ့နဲ့ ပြန်တွေ့ခြင်း)
............................................
     လီကွမ်ရီသည် လှောင်ပြောင်သံတွေကို ခံစားပြီး အချိန်ဖြုန်းမနေခဲ့ပေ။ တကယ်တော့ ကျင်းထဲ၌ ပစ္စည်းတစ်ခုကို အမှန်တကယ် မြုပ်နှံခဲ့သည်။ ထိုပစ္စည်းက တောင်၏အနက်ရှိုင်းဆုံးနေရာသို့ နစ်မြုပ်သွားခဲ့ပြီ ဖြစ်သည်။ ထို့ကြောင့် အခြားသူတွေ မြင်တွေ့ဖို့ မဖြစ်နိုင်တော့ပေ။

     ထိုပစ္စည်းလေးသည် လွန်စွာ ကြောက်စရာကောင်းသည်။ ရှေးမင်တွေနှင့် တိုက်ပွဲအပြီးတွင် သူက ယခုလိုပစ္စည်းလေးတွေကို မြို့အတွင်းရှိ လျှို့ဝှက်အဖွဲ့တွေ၏ လုံခြုံမှုအတွက် ပေးအပ်ထားခဲ့သည်။ ယခု စစ်နတ်ဘုရားတောင်တန်းသို့ မလာခင် လျှို့ဝှက်အဖွဲ့တွေထံ သွားပြီး ပစ္စည်းအားလုံးကို ပြန်ယူလာခဲ့ခြင်း ဖြစ်သည်။

     လွန်ခဲ့သော နှစ်သန်းပေါင်းများစွာအတွင်း ဤနေရာ၌ နတ်ဘုရားများအကြား စစ်ပွဲကြီးတွေ ဖြစ်ခဲ့သည်ဟု လူအများအပြား ယူဆထားကြသည်။ ထိုယူဆချက်က မမှားပေ။ နတ်ဘုရားတွေကြား စစ်ပွဲတွေ ဖြစ်ခဲ့သလို ဤနေရာ၌ အင်မော်တယ်ဧကရာဇ်တစ်ပါးလည်း သတ်ဖြတ်ခံခဲ့ရဖူးသည်။

     စစ်နတ်ဘုရားတောင်တန်းဟု ခေါ်ဆိုကြသည့် ဤနေရာအကြောင်းကို သိရှိသူ အလွန်နည်းသည်။ ဤနေရာသည် နတ်ဘုရားတွေ၏ နေရာတစ်ခု ဖြစ်ခဲ့ဖူးသည်။ နောက်ပိုင်းတွင် ရှေးမင်တွေက ကမ္ဘာကိုးခုကို သိမ်းပိုက်ခဲ့၏။ ပြီးနောက် အနက်ရောင်နဂါးမင်းဆက်ကို ဤတောင်တန်းပေါ် အုတ်မြစ်ချတည်ဆောက်ခဲ့သည်။ စစ်နတ်ဘုရားတောင်တန်းကို သူတို့၏ဘိုးဘေးမြေပြင်အဖြစ် သတ်မှတ်ခဲ့ကြသည်။

     ထို့ပြင် ရှေးမင်ခေတ် ကုန်ဆုံးပြီးနောက် လီကွမ်ရီက တောင်တန်းပေါ်၌ အင်မော်တယ်ဧကရာဇ်တစ်ပါးကို သတ်ခဲ့ဖူးသည်။ ထိုတိုက်ပွဲအတွင်း မရေမတွက်နိုင်သည့် အသက်ပေါင်းများစွာ သေခဲ့ကြရသည်။ တောင်တန်းတစ်ခုလုံးလည်း ရစရာမရှိအောင် ပျက်စီးသွားခဲ့သည်။ နောက်ပိုင်းမှ စစ်ပွဲအတွင်း ကျဆုံးခဲ့သော အလောင်းတွေကို အသုံးပြုပြီး လီကွမ်ရီက စစ်နတ်ဘုရားတောင်တန်းကို ပြန်လည်တည်ဆောက်ခဲ့ခြင်း ဖြစ်သည်။