اللهم انصر اخواننا في فلسطين الحبيبة
اللهم اهزم اليهود المغتصبين و انتقم منهم
انك عزيز ذو انتقام
و حسبنا الله و نعم الوكيل في اليهود الصهاينة و في كل من يدعهم علنا او سرا ...فلسطين
____________________________
فكرة انها بتعيش معاه في حوش واحد تفرح اكيد
و علاقته مسبقا بصفية ممتازة
بس مهما كان مش قابل بوجودها في حوشهم مكان امه رغم زواجها بغير بوه
انسحب طول و ركب ع السطوح و رجع يفكر من جديد
زي ما صالح جلس و يدعي لربي يقدره ع الحمل هذا
بعد تفكير طويل دام لساعات
التفكير هذا رغم ان كان طفولي او لان كان طفولي
ما سيطر عليه شي غير ان رفيقته و صديقته ح تكون قريبة عليه
و مش ح تبعد عنه ثاني زي ما صاير حاليا و انحرم ان يشوفها
لهذا قرر و نزل ع شان يبلغ بوه : خلاص يا بوي انا موافق
و حمل و انزاح من ع اكتافه : ربي يقدرني و نحافظ ع امانة عمك ابوبكر و ان شاء الله مش ح نقصر معاك يا ولدي
ابتسم مجاملة و طلع شاف للدار الفاضية : الدار هذه عادي نعطوها لفافي
ابتسم لفرحة ولده : عادي
و بهكي قرر يجهزها بنفسه لشقيقة روحه
بدي ينظف فيها
شافه بوه و تذكر ان حتى هو لازم يجهز داره لصفية و ياخذ ملابسه منها يبي يخليها فترة ع راحتها لعند تتعود ع الوضع
و انشغل كل واحد منهم في الاهتمام بمن اتخذت ركنا و حيزا كبيرا في حياة كليهما
اللي يشوف عزو كيف ينظف في الدار
والا كيف يزوق فيها
و الا كيف يرتب
ما يقول ان عمره ما دار حاجة بروحه
و لا يقول ان شخص لا مبالي و اتكالي
بس يفرق الموضوع وقت تكون هي بطلته و مضمونه
اما في الرابطة و عند سماع حسين جن جنونه : كيف توافق كيف؟
نعيمة بشرح : اسمعني يهديك الله هكي خير
دفها و طلع طول لحوش اهله كانت امه في الصالة و معاها صفية
و بدون مقدمات اشارلها باصبعه السبابة : ان كان خذيتيه تنسيني يا بنت بوي تنسيني
و طلع
صفية شبحت لامها بنظرة مكسورة
و رجعة ما في ايدها شي : خليها ع ربك يا بنتي لكن حتى انا رايي من راي عمك خميس كلا سليمة و الله ما تنقرب و حسين عارفة حتى هو طبعه كان صبر عليك العام هذا العام الثاني مش ح يصير و بالذات لو جي حد و طلبك ع شان هكي يا بنتي خوذي ولد عمك خيرلك
بدت تبكي و تتكلم معش قدرت تسيطر ع نفسها : و انا شنو جابرني نقربها هي و الا غيرها انا نبي نربي بنتي بس.. انا يا ناس اللي فقدته هذا راهو كل شي عندي راجلي وعزي و سندي و بو بنتي جيته صغيرة و بعد اللي صار مع اهله دارني كل عيلته خلوني نربي بنتي خلوني نصدق ان مات انا مازال نراجي فيه يخش عليا و الا يناديني مازال نراجي فيه يطلب مني اي حاجة يطلب روحي وين مشيت يا ابوبكر بس و شنو درت فيا الله يسامحك يا ريتك لا وصيت و لا قلت حاجة
