( السلام عليكم اليوم باذن الله ح تكون في حلقة ثانية بس متأخر شوية ...قراءة ممتعة للجميع )
__________________________________
و بشروق شمس يوم الخميس
خلاص دقت ساعة الحسم
زي ما كانت ايدها ع قلبها من قوة نبضاته بسبب التوتر
كانو نبضات قلبه مجنونات في سرعتهم بس لان نصفه الثاني قريب يزين حوشه
ع عكسهم كانت حواء تبكي
اليوم بس نزلوا دموعها حست باضاءة حوشها بدت في الخفوت لان بنتها ونيستها خلاص ما هي الا ساعات و تدير دار بروحها و يا ودي حتى هدى واضح جدا مش مطولة لهذا من الطبيعي جدا انها تبكي
ع جنب كانوا كل من زهرة و بنتها علية مقعمزات
زهرة بتدمر واضح : بوك شي ما باش يقول هيا عييت انا ...
شبحتلها و مش مصدقة : قصدك تبي تروحي قبل تجي العروسة ؟ كيف يا ماما ؟
فنصت فيها و تكلمت بصوت واطي : يا فالحة شكلك نسيتي بيان بنت خالتك اليوم تبيني نفوته لا و الله ما صارت ما قلنا شي حوش عمك جيناهم و يشهد عليا ربي فرحت ان تسامحوا بوك و عمك لكن عاد بنت اختي ما نقدر نسيبها
طارتلها : يا ماما توا عاد زي البيان زي العرس انا مش مروحة من توا لازم تعرفي انت بتمشي سلامتك
زهرة : ما ماشية الا بيك حلوة هادي نخليك وراي و نمشي
معش ردت عليها و واضح معصبة
شافوا هدى و فريدة طالعات مع بعض
: حيه و هادي كيف ماشية و مسيبة الحوسة وراها
علية ما ردت علي امها و مشت مع البنات اللي يغنوا ع العروسة ...
سلموا عليها و مشت فريدة للمزين في طرابلس مع اشرف و هدى
و بالعهد وفت و كانوا معاها باقي بنات منصور يضموا و يحوسوا و ما خلو حواء تحس ان بناتها مش قاعدات ... و اي حاجة تبيها حواء من برا كانت عفراء تديرها
اخر شي : ترا يا عفراء شوفي القاراج (المكان اللي يطيبوا فيه ) و هنيني عليه قبل وقت الغذي
عفراء : هيا ماشية
طلعت بسرعة و كانت لابسة توتة لونها اسود و حاطة البرنوص ع راسها
اول ما خشت تفاجئت بيه يطيب ع غاز الشاهي في دحي مقلي و جنبه براد الشاهي : صباح الخير
" عليك صبح قنين " : صباح النور.. تبي شي
توزع في نظراتها ع المكان : لا عمتي حواء قالتلي شوفي بالك في حاجة حايسة اهني قبل يبدو في الغذي
شاف حواليه و ضحك : غير حوستي انا ما فيه شي و تريحي بعد نكمل نضمها بروحي
ابتسمت و بتخش
