(كالعادة الظروف زي ما تجبرنا نتأخرنا احيانا تحفزنا للتنزيل قبل الموعد ... قراءة ممتعة ❤️❤️❤️)
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
ذقنا الوصال فهل نطيق تباعدا ....
هل بعد اصل الصوت يروينا الصدى
ماظل شبر في ولاية خافقي ....
إلى على حكم الفراق تمردا
ماكنت ممن يمنحون قلوبهم ....
فسرقت قلبي عامدا متعمدا
لو خيروه الآن اين مقامه ....
لاختار صدرك دون ان يترددا
فلئن قبلت به فقد اهديته ....
وطنا وإلا قد يعيش مشردا
(Somya Bun Amran)
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
و كلمة .. ممكن تقلب كل شي راسا ع عقب .. اي كلمة وحدة و عمركم ما تهزوا عليها ... الكلمة اللي تطلع في لحظة غضب او فرح او حزن شديد او حتى لحظة عدم تركيز ....
اشرف حاول كذا مرة يتصل بالسائح من بعد ما روح من طرابلس بدون فايدة الخط ما يشد ابدا
لهذا قرر يفتح الموضوع مع بوه و امه و بوجود خميس ع شان يقنعهم بزواجهم و سفرها معاه لايطاليا لبين ما بدي يبني هو حوشه و كمله
و كعادته بدي خميس الكلام : هيا يا اشرف من بكري وانا نراجي ع نار شني في سامع حاجة ع خوك والا كيف ؟
و عاد العقل يغيب مع ذكر اسمه : شني ؟ لا ما تقولها يا اشرف خيرا خوك ؟
: خيركم بالشوية بس ! و الله ما فيه حاجة غير هذرزت معاه و حسيت من كلامه ان مازال مطول برا و الخدمة اللي مربوط بيها مش قادر يسيبها و لاني مجرب الغربة فكرت يعني ليش ما يدير العرس توا و تسافرله مراته تقعد معاه غادي لعند ما يكمل حوشه
حواء ما خلت حد يرد : انت شني تقول يا اشرف تبيها تسافر بروحها معناها هو مش ح يحضر العرس و كان ما جي لعرسه و سافرتله هي مازال نشوفًوا وجهه احني لالا انا مش راضية
خميس كان ملتزم الصمت لان قدر يلاحظ ان اشرف مرتبك و توقع ان في شي وراء الكلام هذا
و كلا من اسماعيل كان رايه من راي اشرف : يا ودي حتى انا عندي تسافرله و الا يروح هو يديروا العرس و تسافر معاه المهم ما يقعد بروحه برا اشرف كلامه صح الغربة واعرة ع الواحد بروحه
