كلي اسف و اعتذارات و احراجات منكم بس اللي صار زي ما قلت اني ديما نكتب في الحلقات ع الوتباد و وقت امس جيت نبي نراجع الحلقة و نكملها قبل موعد التنزيل القيت الحساب عندي فيه مشكلة لعند الساعة 12 و انا نحاول معاه و في الاخير وقت قدرت ندخل للحساب و نفتح الحلقة القيتها ممسوحة بالكامل اضطريت نعاود كتابتها من جديد و لان الحلقة فيها احداث و فيها نقلة نوعية من ناحية الزمن و الشخصيات كانت تبي وقت طويل و جهد و تركيز تاخرت لعند اليوم و ما قدرت نرد حتى ع رسائلكم عندكم حق تعاتبوني و تزعلوا مني بس هذا اللي صار و قرائي ع الوتباد ما قدرت انزل اعتذار زي الفيس لان المشكلة اصلا في الوتباد ... سامحوني مرة ثانية و حاولت نعوضكم بحلقة طويلة و كأنها حلقتين ع فكرة نتمنى تنال اعجابكم و نتاسف مرة ثانية ....
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
الصورمن اهداء الصديقة العزيزة ريمة يا ريت تدعوا لوالدها بالرحمة ...
_________________________________
ما ياخذك عز الخطا....
ولا يذهبك قول قايل.
هناك ناس رفقتهم دوا....
تشفي جميع العلايل .
وهناك ناس مافيهم عزاء.....
ولا تثمر فيهم جمايل.
والدنيا راهي هواء.....
ويوم لآخرة بالفعايل .
(عفراء)
(كلمة الحق )
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
و من اليوم هذا كل من الشخصيات حياته ح تاخذ منحى جديد ....
حاليا في صيف سنة 2009 ....
كانت تتكلم و صوتها كله حسرة و ندم : الحوش اللي كان ديما فيه حس العيلة و حس الهدرزة و اللمة اليوم صار مجوب و ما في حد يزور ناسه و لا في من يجلي همه ...
اشرف مش حاب يزيد يكدرها : تبي تطلعي يما انطلعك عادي راهو
شبحتله و عيونها دموع: وين بتطلعني ؟
اشرف بعد تفكير : شني رايك نمشوا لحوش خالي و تهدرزي عند خالتي رجعة ..
ما عندها نية تشوف صالحة لانهم كل ما ينفتح موضوع عفراء يتخاصموا: ما عندي نية ... قولي ما كلمك خوك ؟
اشرف : كلمني امس و يسلم عليك .. حاله باهي و خدمته مليحة اهو لاهي فيها
حطت ايدها تحت خدها و تفكر : زعمه مش ح يجي في رمضان ؟
اشرف كان واخذ منه معلومة اكيدة ان مش جاي: و الله ما نعرف قبل ما قال شي ع رمضان
نزلو دموعها : كره البلاد كلها من وراها ما خاطر عليا يدير فيا انا هكي ع خاطر مراة ...
مش حاب يفتح السيرة لان في كل مرة تنتهي بعركة : خلاص يما انسي ..
حواء : كيف بننسى بالله و هو هج من وقت الدوة السوداء عليها
و اهني معش تحمل خلاص: و ع سيرة الدوة السوداء هاديكا انت حتى بعد سافر قعدتي وراء كلامها هدى و خطبتيله بنت من غير علمه لولا خالي خميس وقف كل شي راهو توا اشبح وين وصلت بينك و بينه السايح يا امي هذه حياته لازم تفهمي حياته هو مش حد غيره انا مش خوه و اكبر منه و صاحبه لكن ما نقدر نقوله خوذ هذه و سيب هذه ...
