مش كل حد نقولوله سند .. و لا كل حد في ذراعه نشد ... و لا كل حد لو غاب ننهد ... حبيتك حب ما عنده عدد ... و غلاك اليوم كبير ماله حد... نعطيك عمري و جميلك ما نرد... و ما كل حد نا نقوله سند .. و لا غير صلوحه في ذراعه نشد ... (كلماتي )
__________________________
كانت تعدل في المخدة وراه : احسن حاجة خليتوني في حوش عمي خميس ... نقدر نشوفكم و في نفس الوقت اريح ع شان الناس اللي بيجو
مبتسمة : المهم انت مرتاح ... تبي شي ثاني توا
كان واضح عليه ان يبي يسال : نبي نعرف وينه ولدي يا صفية ! اكيد متحشم من اللي داره بس انا عارف في شي صاير معاه كلموه يجيني و توا نتفاهم معاه
تهربت منه : توا نشوف حد يكلمه بالك عمي خميس يسمع منه احسن و توا خلي نفتحلهم الباب لان زي ابوبكر و زي فافي بيطيروا من بكري يبو يجوك غير انا ما خليت حد يخش لعند تاخذ دواك و تغير و ترتاح
حط ايده جنبه : باهي قعمزي حاس فيك شي يا صفية مش تقولي مرض و طاح خلاص معش نقدر نشكيله
بدت تواسي في محرمتها تهربا منه: لا و الله حاشاك من الطياح مش هكي بس قلت ترتاح و بعدين ما يجي نهدرز معاك اهني عارف الماشي و الجاي وزيادة صالحة من بكري تستنى لعند عمتي ترقد باش تشوفك
بضيق : غير كان خلتها تجيني و نشوفها خلاص خذينا ع كلامها و عارفها تنسى
كان التوتر مسيطر عليها : يصير خير شنو توا اناديهم
اتضايق من تصرفاتها : ناديهم و انت مش متحملة تقعدي معاي دقيقة
وجعتها منه بس المشكلة خايفاته يكشف اللي صاير من وراه : حرام عليك يا صالح توا هذا كلام ... بس انت عارف اني مخلية كريمة و الصغار في حوش اهلك.. الليلة شدهم عمي خميس يباتو و المراة يشهد عليا ربي ما قصرت معاي لا هي و لا بناتها توا معقولة يجي في عقلك اني متضايقة منك
حاول يكذب احساسه انها مش قادرة تقعد معاه: باهي افتحي الباب مستاحش الصغار ...
قربت منه و باست راسه : الحمدلله اللي ربي نجاك لينا
و خذت ملابسه في ايدها و طلعت
مع ان كان متضايق بس تصرفها بالطريقة هذه ريح قلبه
و ما ان فتحت الباب حتى هجم ابوبكر يجري و عفراء لحقت بسرعة عليه شداته : بالشوية بكار بابا مريض
وقف جنبه : حقا
ابتسم و شد ايده و ساعده يجلس جنبه : تعالى منكم انتم عمري ما نحس الوجع ضي عيوني انتم راهو
تذكرت الغايب الحاضر و قربت باست جبينه : الحمدلله ع السلامة
شد ايدها : الله يسلمك يا بنتي ... كيف حالك طمنيني عنك
ردت بدون ما تشبحله : الحمدلله
زاد ركز و زاد شكه : درتي اللي قلتلك عليه
