(السلام عليكم تقبل الله منا و منكم و نعتذر ثاني ع التأخير و اليوم حاولت بقدر الامكان نعوضكم ❤️❤️❤️)
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
وحربك مع نفسك اشرفلك حرب
مالك ومال الخلق واللي فيهم
اخذي درب واحد موش مية درب
وراك يوم لا يلقوك لا تلقيهم
#محمود اكنيش.
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
العشق وقت يستوطن قلب انسان صادق و محب بكل جوارحه يفعل به ما لا يفعله شي في الدنيا
لهذا من الصعب عليه ان يعشق مرة اخرى لا يستطيع ذلك حتى وان اراد فقد اوصدت تلك الابواب برحيل من عشقوا
في اطهر بقاع الارض و تحديدا في ساحة الحرم
امين حاس بسكينة لا مثيل لها : مش عارف كيف متقبل الامر عادي بس ! مش قادر ناخذ منك موقف نعزك و نكرهك في نفس الوقت نحترمك و محتقرك في نفس الوقت مديون ليك و حاط الذنب عليك في نفس الوقت
قاطع كلامه : ما فيش بس ! و كل اللي قلته مقدره و متفهمه ، اختك الله يرحمها عمرها ما غلطت في حقكم و لا انا غلطت صح كنت نبي ناخذها بالحلال بس ربي ما كتبش لكن و لا مرة غلطت في حقها بنت جيرانا و كبرت قدامي و القلب حكمه بروحه يا امين غصبا عني ما تحكمت في مشاعري
هو كان تفكيره في اتجاه ثاني : ممكن تتزوج بعدها ؟
عيسى ابتسم و ابتسامته كلها شجن و الم : مستحيل لاني لتوا حاس بالذنب و اخر الليل يجيني صوت يقول انا اللي قتلتها بايدي مش قادر نسامح نفسي يا امين
امين بدي يبكي : اماله انا شنو نقول ؟ امي عبت عليا معاها سيبتها و طلعت لو قعدت ممكن صح ما قدرت ننقذها بس ع الاقل كنت متت معاها و تريحت يا عيسى كل ليلة نشوف فيها تعيط في الحوش و تنادي باسمي و مرات تفنص فيا و ما تكلمني قلبي معش متحمل خلاص هذا اللي خلاني ندور اي شلة نخش معاهم في اي موضوع المهم ننسى
كل اللي قاله هو عايش فيه لكن لان جرب الضياع و القي نفسه في رحاب الله حب يساعده و كيف لا و هو اخ احب الناس ع قلبه: و تسيب طريق ربي ؟ اللي تضيق بيه اول حد يفكر فيه هو الله يلجأله و يطلب منه الفرج و السماح مش يدير معاصي ؟ باهي فكرت في بوك و امك معش عندهم غيرك يا راجل لو تصير فيك حاجة و الله ما يتحملوا
امين مسح دموعه : عارف بس ضعفت
كان يتكلم بنبرة صوت تعطي ثقة للمستمع: من اليوم معش تضعف و حط في بالك انا خوك و اي حاجة تبيها كلمني بس و كمل السنة اللي مازالت وراك في الجامعة و فرح اهلك بنجاحك و عملك و بعدها ديرلنا عرس عاد.! نبو عرس في الشارع
ضحك : ذكرتني بايام زمان وقت كنا نراقبوا في ولد عمي خليفة كيف يشري في الاثاث و بيتزوج وقتها عزو قال انا اول واحد بيتزوج ( ابتسم بتهكم ) يحساب روحه بياخذ الريقولي
