(صحة فطوركم ... و تقبل الله منا و منكم ... ❤️❤️❤️)
_________________________________
غير كيف نصبر لليوم الثاني
ونقعد اسيرة بين مات وحي
وكيف نقدر أنقول كاني ماني
والحزن سيطر والفراق الكي
ربي يعطيك الصبر يا عفرائي
ويكحل عيونك بشوفت الغالي
#حجر_العقيق
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
و يصير الفراق امرا واقعا ...
كل شي طعمه يتغير
الجو كئيب هلبة و حزين
تحس حتى المكان قاعد يبكي
وقت انقالت كلمة عمرك شفت شي باب عم يبكي؟
اليوم هذا كل مكان مر عليه في حياته يبكي
البدر يبكي و ذهب تبكي و الفرس الجديدة تبكي
الراعي اللي كان جايبه يرعى الغنم قاعد في زاوية و يبكي
وقت الانسان يكون اثره ع البعيد قبل القريب هكي اعرف ان عملة نادرة
ان انسان من الخيرين اللي قلما يكونوا موجودين في محيطنا و ان وجدوا علينا التمسك بهم ... و ممكن بسبب الخير اللي دايره في حياته اليوم او غدا ربي يكافئه عليه
عفراء بسبب سوء حالتها تم اسعافها لطرابلس و اللي خذاها خالها عمر و معاه حسين طبعا و لمعرفة عمر باهل الاختصاص توجه طول لاخصائي امراض عصبية معروف و شرحله حالتها السابقة و الحالية و الاهم اعطاه صورة كاملة ع وضعها الحالي بما فيه الحمل
و حاليا قاعدين يستنوا في خبر منه بعد ما دخلها لحجرة الكشف ...
حسين : تكلم صفية ؟
عمر متأثر هلبة من جهة السايح و من جهة هي : من رايي الكلام يكون مع راجلها و هو اللي يقوللها خير
حسين : لا حول ولا قوة الا بالله ، حاجة كيف الكذبة
و تعصب عمر : لعند نموت ماني مسامحه اسماعيل ، يا راجل من امتى صحبة هو وخوه يورط السايح بدون ما يشاورنا ع الاقل راهو قال لعمي مش هكي بكل ثقة يقولي لا مشي هو واولاد عمه تفضل توا طلع بوهم مكلمهم ما يمشوا ودفه بروحه طاجين و نحلف عليه الا يكذب ما كلم السايح بكل
حسين : و الله العظيم حلال فيه طريحة و معاك حق كذاب راهو انا متاكد ما كلم السايح و الا ما كان ودر روحه ، الله يرحمه و خلاص خسارة التريس و خلاص واحد كيف السايح ينقتل بالطريقة هذه و فوق هكي ما يندفن ، حسبي الله و نعم الوكيل لا خش في حرب لا خنب في حاله من يومه يا راجل
عمر دمعو عيونه : قولك معش في امل
حسين بحرقة قلب : ايه يا خوي ذكرتني اول ما سمعت بالمرحوم فؤاد ياما قلتها بالك فيه امل قعدت كم يوم نراجي في خبر يقول مش هو عاد ماهو عارف انت وضع الجثة وقتها ، و يوم نسمع بفلان القوه محبوس والا فلان كلم اهله برا البلاد هارب نقول بالك حتى انا عندي نصيب زيهم ، اللي مات معش يولي يا ولد امي خسارته و خلاص مشي في غوط الباطل مشي في حاجة تافهة ما تسواش راح ع عمره و مرته و ولده اللي اشبح يعيش و الا لا !
