الڤار (The Var)

Part 72

سأقول ... أحاديثك المختبئة بي ...
وعيناك ... التي تجيد بعثرتي ...
وقلبك ... حين ينبض في ضلوعي ...
وقربك ... الذي أتمناه في كل حين ...‏
ولا عيب فيك غير أن قلبك
كأنسام ليل بل أرق وأعذب
ولا سوء فيك غير أن حضورك
يرف له قلبي وللروح يسلب
‏ وكيف لي أن أخبرك .!!
عن تعب قَلبـــي عندما أفتقد حديثك
لن أقول إشتقت لك
لكنني #سأكتفي بكتابة....
ينقصني_انَـَـَتَ _لأكون_أنا ..

السايح🥺

🌸🌸🌸🌸🌸🌸🌸🌸🌸🌸🌸🌸🌸🌸🌸🌸

اليوم من الصباح الباكر و هو في المطبخ لان طلب من امه ترتاح ... لان هو ح يجهز وجبة الافطار من الالف الى الياء ...

و بينما كان يشتغل بمحبة كبيرة ... سمع صوتها خلفه : هدى .. تعالي قعمزي لكن ما تديري شي هذرزي عليا بس اليوم الفطور ع خوك

وخرت الكرسي و قعمزت : ليش متعب روحك خليتنا احني درنا الفطور

يغسل في الخضرة و مبتسم : يعني انتعب روحي و نوكل الطليان " ضحك في سره لان تفكر كلامها " و نستخسر فيكم انتم !! مش معقولة عيب في حقي و بعدين هكي خطر ع بالي و قررت اليوم ندير الفطور انا

جاب الخضرة ع الطاولة و بدي يقشر فيها بدقة و سرعة هي مبهورة بيه واضح ان متطور هلبة عن قبل : ماشاء الله تخدم بسرعة

السايح مركز في خدمته : ضروري وقت الواحد يشتغل في مطعم كبير و زباينه هلبة يتعلم حاجتين الدقة و السرعة و الحمدلله ربي وفقني و تعلمت

هدى تفكرت ايام زمان : من يومك تحب المطبخ سبحان الله ع ايام زمان كيف كنت تفيق قبلنا تخش المطبخ توتي الفطور ع شان تساعد امي تاريتك حتى تحب الخدمة فيه

تنهد : ما نكذب عليك زمان ما كنت مفكر اذا نحب التطييب او لا كل اللي كنت نفكر فيه وقتها فعلا اني نساعد امي بس بعدين حبيته و بديت وقت ندير الحاجة نديرها وانا مبسوط زي توا مش مجرد اني نطيب لا الطبخ فن و ذوق و هذا اللي يخلي الاكل من اشخاص معينين احلى من غيرهم

هدى : ممكن ...

نزلت راسها و تلعب بالدبلة

و هو يقشر في البطاطا لاحظها حط من ايده : شني صار بينك و بين عامر

شبحتله و عيونها دموع : سيبني و مشي لمصراته ! عمري ما توقعت يا سايح انك تحب حد اكثر منا ! اكثر من امي و اكثر من عيلتنا احني خواتك اللي كنت تقول عنا بناتك معقولة ع شانها تمشي تفضحني قدامه

تفاجا من طريقة تفكيرها : هذا اللي فهمتيه يا هدىً من تصرفي معاه ! ابدا و يكون في علمك اني ابدا ما شكيت فيها بعد كلامك لدرجة نشك ان الغلط من ليبيانا يحطوا رقمها في تيليفون راجلك و لا هي تديرها بس انا مشيت بنحاسبه ع شي انت قلتي ان داره في حقك و هذا غلط كبير شني عرفني انك كذبتي