في مقهى ......
: لا متحسنة امورك مولي زي الاجانب بالضبط ع الموعد
مش طايق حتى يسمع صوته و هالشيء مش جديد : قول اللي عندك و انا و الله لولا ال...... ما كنت اصلا لا جيت و لا وريتك وجهي
ضحك : عندك حق ... بس انا تعودت وقت تكون مديون لحد ما تقدر تكمل حياتك بدون ما تخلص الدين هذا و ع شان هكي جيتك نبي انرد الدين اللي عليا
حط الظرف قدامه : خوذ و تفرج ع راحتك حبيت نطمنك الباين ما قدرت تمشي بروحك ل.... اهو انا مشيت و جبتلك الاخبار
كان يشبح للظرف و من داخل ميت خوف
سأل نفسه باهي انت مش واثق فيها
علاش الخوف هذا
و مهما تكون واثق لكن البعد و الهجر ليهم سطوة علينا
و يخلونا نفقدوا الثقة و لو للحظة
: خيرك هكي زي اللي خايف عموما انا ح نساعدك
فتح الظرف و فرد الصور قدامه
و يا ...
اهي قدامك تضحك فرحانة
و مش واحد و لا اثنين اللي معاها
معقولة في دنيًا زي هالدنيا
و مع ناس زي هالناس مازال تخطر ع بالها
ان كان خطرت حتى كيف الذكرى اللي ما عاد تبيها تجي ع البال حالي باهي
انا وين و هي وين
والباين بنجي لكلامك يا خوي يوم طلبت مني نقول (" ما نبيها )
وقف و لم منه الصور كلهم الا صورة وحدة : كرم مني بنخليهالك تفرج عليها ع شان تفهم اني يوم اللي قلتلك ما تدخل بيني و بينها كنت نبي مصلحتك انت بالدرجة الاولى مش مصلحتي انا سلام
مشي كم خطوة و رجع : تبي الحق ما هانت عليا نخليها معاك
خذي الصورة و طلع
و هو من مكانه ما تحرك
و حس فعلا ان قاعد في ذات المكان يوم سيباته و مشت مع ....
الباين هنت عليك يا غاليتي
وغلا قلبي اهو اليوم نسيتي
صرتي بعيدة وعني تواريتي
لبلاد .......... بعيدة مشيتي
(كلماتي )
مع تحياتي
مارية علي الخمسي ❤️❤️❤️❤️❤️❤️
