( بدل حلقة طويلة درتهم حلقتين متوسطات في الطول ع شان نقدر انزل في الموعد و الثانية تنزل في وقت قد يكون متأخر .. و نعتذر منكم لان و الله صعب مع الخدمة الالتزام بالمواعيد )
_________________________________
أتعرفون ما هو ...وجع الروح......
هو انين قلب صامت يأبى أن يبوح بالألم...
ف كبرياء عقله يحول بينه وبين البوح ب آلاف الكلمات التى تعجز الجوارح أن تنطق بها...
هو اختلاط المشاعر...انين.....واشتياق.....وصمت.....
هو الابتسامة دون فرحه هو الحديث دون رغبة
هو بكاء قلب دون دمعه.
فرحمه الله على روح ارهقتها الدنيا فكتمت...
واوجعتها الحياة فابتسمت..... ❣️
#السائح (Úm Àlgood)
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
من قال انسانة زي مبروكة توجع الكل بموتها و قد تكون طريقة الموت هي الاثر وجعا
عادة النظرة و الانطباع العام ع اي زوجة ثانية انها دخيلة ع اي عيلة و من الصعب جدا اعتبارها ضحية بل و من المستحيل التعاطف معها
بس حاليا من ما وجعاته؟!
من ما حس بالذنب اتجاهها
واكثرهم احساسا بالذنب
هو و هي
هو لان سمحلهم ياخذوها و لان مشي لخوتها و اشترط انهم ياخذوها ع شان تنحل المشكلة ... كون امه طرف في الموضوع صعب الامر عليه و من الصعب جدا ان يكون موضوعي حينها
و كلا هي !! كيف وثقت فيها مبروكة دونا عن الكل و كيف استنجدت بيها في نظرها ابدا ما كان امر بمحض الصدفة وانما في من وراه حكمة !!
و حاليا تانيب الضمير بيقتلها ... و في نفس الوقت شايفة ان كلهم خذلوها ...
و يا قلبه و يا قلبها ما بعدكم من اوجاع عميقة تستنزف كل ما فيكم من صبر و من جلد و من حب لهذه الحياة بس لانكم من اصحاب القلوب الصافية الخالية من الاحقاد
اشرف يحاول يواسي خوه : هو معاك حق حتى انا وجعتني و حاس بالمسؤولية لكن يا سايح حتى نفسك عندها عليك حق وانت عذبتها فوق اللازم هالنفس هذه
يتكلم و هو مغمض عيونه : اي نفس يا راجل اي نفس ؟ انا مش قادر نتنفس الظلم واعر واعر المفروض من يوم اللي شفتها بالمنظر هذاكا تصرفت واجهت بوي اقل شي و درت حل مش قعدت تتفرج و نخمم في امي بس خفت ع امي منها بس ما خفت عليها هي من بوي ؟ خيرنا هكي بس! تعرف كيف هذا السبب ان صفة العدل عند ربي بس احني مش قادرين حتى نمنعوا انفسنا من الظلم مقهور يا راجل يومها كيف تعيط و تبي عفراء تساعدها و مش عارف ننقهر عليها هي و الا ع بنت عمري اللي انا اكثر واحد عارف شني اللي صاير فيها توا
استوقفه الكلام و قدم من خوه تمسك بايده : بنت عمرك ؟ يعني انت ؟ معناها امي وقت تكلمت ع البنت اللي
ما خلاه يكمل : اها صح هي البنت اللي نبيها و عشقت فيها من لما كان عمرها خمس سنين كانت غير البنات في عيوني و كانت و مازالت من اول يوم زينة في عيوني بس ما هي ليًا اتذكر وقت قلتلي لازم تقنع روحك و تقول انك ما تحبها لانها مش ليك والله حاولت من هذاك اليوم نقولها لروحي و لقلبي و لعقلي (بدي يخبط في راسه بايده ) بس شي هذا ما باش يفهم هنا ساكنة يا راجل هنا معششة في دماغي ما قدرت نطلعها منه كيف الواحد يحب حاجة ماهي ليه ماني عارف
