المقدمة هالمرة ح نقدمها بشكل مختلف
ليس باشخاص او عائلات وانما بمدن ح تكون مسرح لاحداث و تفاصيل الرواية
نبدوها من عروستنا عروسة البحر طرابلس زينة المدن عصية ابية ع كل حاقد زي ما بلادنا عصية ولان فات عليها هلبة و شافت هلبة مع كل محنة تكتسب عنفوان و شدة حفظها الله من كل شر
طرابلس هي المدينة اللي زي الام مهما تفرقوا اولادها يجي يوم و يلتموا عندها لهذا شخصيات الرواية تلاقوا فيها و لو افترقت طرقهم مرجوعهم و لقاءهم عندها
بينما المدينة الثانية هي مدينة الجبل غريان الحبيبة بناسها الطيبة اصحاب الشهامة و الاخلاق و القيم الانسانية
غريان اللي ينطبق عليها مثل يا جبل ما يهزك ريح صبورة و مكابرة ع كل ضيم حفظها الله من كل سوء
المدينة الثالثة هي الرابطة ... و يا سعد من عنده فيها معرفة قريب او صديق ناس بسيطة صح لكن اطيب منهم ما فيش تربوا ع البيتية و الجيرة و محبة الغريب و القريب و ح نتعرفوا عليها اكثر من خلال احداث الرواية
ختامها ح يكون مسك مع بنغازي ... فان كانت طرابلس عروس البحر فبنغازي هي لؤلؤة هذا البحر ... و هي كما معروفة عند الجميع باسم رباية الذايح ..حفظها الله بناسها الكرماء من كل شر
و بهكي سردت عليكم اهم المدن اللي ح يكونوا احداث الرواية فيهم
الشيء الاخير اللي وجب التنوية عليه ان الرواية تدور احداثها من 1990 الى الوقت الحالي ...
مع تحياتي ليكم
مارية علي الخمسي ❤️❤️❤️❤️❤️❤️❤️
