(شكرا ع الصور Howaida Ali)
_________________________________
لا زلت أتأمل وصف إبن القيم في الحب قائلاً:
"إذا امتزج الماء بالماء؛امتنع تخليص بعضه من بعضه،وقد تبلغ المحبة بينهما حتى يتألم أحدهم بتألم الآخر "
ليس هناك أكثر دقة من هذا الوصف للحب ولا هناك تعبير أكثر صدقاً عن الحب من هذا❤
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
بعد رجوع الكل لمنازلهم تجنب خميس الرد ع اسئلة اي حد فيهم و طلع برا متوجه لداخل الحوش بس سمع صهيل الخيل شك بوحود حد و توقع وجودها هي
رمي الجرد وراه و توجه للمكان ،
من جهته سمع وقع خطاه ع الارض مع صوت الزقية حس نفسه ضاق خايف من اللي ح يسمعه من خاله
: سايح ! شني تدير مع الخيل للوقت هذا
بدون ما يشوفله: ليًا وقت معش شفتهم، جيت نطمن عليهم... خالي
من طريقة نداءه حس ان في من وراه شي : خيرك تكلم طول يا سايح !
هو اي حد يسمعه ح يلاحظ الحزن و الخوف في صوته فكيف. بمن هو اقرب اليه من امه وابيه : قولي يا خالي انت ليش عزمته من الاصل هذا اللي اسمه ابراهيم
استغرب معرفته بالامر و هو وصل متاخر : وانت من قالك اني عزمته
التفتله السايح : خبرني فارس قبل يروح كان جنبي و حكالي اللي صار
خميس بدي يحكي في اللي صار : يا ولدي انا بعد كلمني و دار روحه ما يبي يثقل علينا في فطور حبيت نوريه ان احني لا كايدين في فطوره و لا خايفين من الكلام اللي بيقوله و اهو لاقيناك عندنا فطرت و هدرزت و بدون ما نفضحوه قدام نسيبه
بان الضيق الشديد ع وجهه : نسيبه هذا هو سبب كل المشاكل يا خالي و انت عارف خليه يحل مشاكله معاه بروحه بعيد علينا
خميس : توا قلت ان فارس حكالك كل شي
السايح متمالك نفسه بالغصب : قالي ع عزومتك لابراهيم و ان جاي يفتح في مواضيع قديمة وقت خطب منا و رديتوه و ليش وصل الموضوع لبنت ابوبكر ما فهمتش
و عرف خميس ان فارس ما قال كل شي : تعالى معاي نقعمزوا ع الكراسي الدوة طويلة يا سايح و خالك ما عاد عنده جهد
مشي وراه و بدي خميس في سرد اللي صار من البداية و فهمه سبب الكلام اللي قاله: انا ع شوي كنت بنودر البنت و بنقوله ان عاطيين فيها كلام لولد عمها بعدها تذكرت انهم مطلوبين و لو طلعت عليها دوة كيف هذه تريح فيها غيرت الكلام و قلت ولدنا و خلاص خليه يسكر فمه عنها و حتى اللي اسمه عزالدين يأيس منها
وقف و كان معصب : شني اللي يبوه منها ؟ و بعدين تبي الحق المفروض خليتوا عمر ردسه تحت رجليه كيف يجينا في بلادنا و يقول كلام عن بناتنا يدير حل معاه بعيد علينا
