ما في شي في الحياة اسمه صدفة كل شيء مقدر و مكتوب و كل واحد فينا ربي سخره ع شان غيره و بهكي وقت يطلعوا في حياتنا اشخاص بشكل مفاجيء و نلقوهم يحتلوا جزء كبير من وقتنا و يستوطنوا مساحات كبيرة داخلنا لازم وقتها نعرفوا ان ربي سخرهم لينا لسبب قد نعرفه مع الوقت و قد لا نعرفه و لكن حينها علينا القول لعله خير
و ان شاء الله ربي يسخر لينا و ليكم اولاد و بنات الحلال
**********************************************
مجرد ما فطرت مع امها و صالح طول الجلسة الكلام كان ع اسراء
صفية : لا تعرفيه الغلط منها او من اهلها كيف يعطوها لواحد مش ليبي خلاص معش في اولاد بلاد
هي تعصبت : كيف تقولي هكي يا ماما ؟ و لو كان مش ليبي عادي المهم شخص كويس الغلط فينا احني و في مجتمعنا و في الناس اللي ما تخافش ربي معقولة لان مش ليبي هكي يديروا فيه
اشر ع عفراء: و الله بنتك عندها حق الغلط فينا تي حتى في الشرع مش حرام من احني ع شان نقولوا غلط
صفية مش عاجبها : ما قلتش حرام بس عاد من يومنا و احني ما نعطوا للي مش لينا اهو توا قعدت بروحها و بعدين طالما اماليها مش معاها معناها واضح مش راضيين انا راهو واجعتني المراة لان اللي صار مش ساهل و يا خوفي الراجل يطفش و يسيبها هي و صغارها
و كأنها تعرفها منذ زمن : بعيد السو يا ماما علاش تقولي هكي
حطت فنجان القهوة : قهرة الراجل و كسرته واعرة يا بنتي و بالذات قدام اهل بيته
صالح بنوع من الحزن و تجربة مشابهة : في هذه امك صدقت نقولوا خير و خلاص
هي وقفت و خذت مفاتيح السيارة : انا اللي عندي حاجة وحدة المراة هذه و صغارها مش مسيبتهم بكل
طلعت من جنبهم
ابتسم : كيف بوها الله يرحمه
صفية بذات الابتسامة : الله يرحمه ... توا قولي كيف بنفتحوا معاها الموضوع
صالح صوته تغير و دمعته عبت عيونه : اليوم نخبرها و عندي فيها ثقة بنتي مش ح تسيبني يا صفية
صفية حتى هي قريب تبكي : خاطري نعرف شنو خطرلهم توا بالذات ؟ و بعدين طول ما المرحوم عايش و لا مرة فكروا يبعثولنا حاجة كانوا خايفين ان يكشفهم حد علاش توا
بنوع من القلق : الباين في موضوع صاير و يستر الله
: بيييب
ضحك : هذه وقت عليها تبيب هونها
وقف و بيطلع
صفية : صالح موضوع السواقة معش تخليها تاخذ راحتها انت عارف انها مازال صغيرة و حتى رخصة ما عندها
: بس سواقة مليحة و ما حد ينكر و بعدين انا ديما معاها الا مشوار المدرسة وقت تروح بخوها
