صحة فطوركم و تقبل الله منا و منكم و اسفة ع التاخير ❤️
_________________________________
سمعت صوته
كلمة عيوني اليوم دارت حوسة
قلبت موازين القلب والمحروسة
دارت فرزة
العين تبكي والفم طالق بسمة
لاعرفت نرقد باش يكمل رسمه
ولا ننطلق للبر وينه وينه
#حجر_العقيق
(ام ميراس فتحي )
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
و بدت الايام في تشابه ... يمشي يوم يجي اللي بعده
و هي عاد المحنة هذه خذت منها درس و اللي هو تحمد الله ع اللي عندك
ما عاد تنق و لا عاد تشكي لانها ببساطة تسال في نفسها وين كنتي و وين صرتي
بس مع هدا كانت ساعية بكل جد ع شان تطلعه من السجن اللي هو فيه و بالذات بعد وصلتهم معلومة الشكوى اللي مقدمينها اهل المرحومة مبروكة لهذا طلبت تقابل رضا و بحضور خالها عمر
طلعت لابسة حجابها و عبايتها : السلام عليكم
وقف بمجرد خشت عليهم : و عليكم السلام
سلمت من بعيد : كيف حالك رضا ؟ و كيف حال اهلك كلهم ؟
: بخير الحمدلله يسلموا عليك بالذات امي عاد
عمر : قعمزي و قولي اللي عندك يا عفراء
جت جنبه و قعمزت : بدون ما نطول عليك يا ولد عمي اول شي مهما تكلمت و عبرت ع شكري ليك نقعد مقصرة
بابتسامته المعهودة : هذه فوتيها و امشي ع طول للي بعدها لان اللي درته واجب في حق اختي الصغيرة و الا مش محسوبة وخيتي
عمر كان يشوفله بنظرات اعجاب كبيرة : ماشاء الله عليك يا ولدي اكيد من حقك
عفراء : عارفة و الله انك مش محتاج اني نشكرك بس حتى انا هذا واجب عليا و اكيد وخيي و يوم اللي نقدر نقدملك اي شي ح نكون فرحانة هلبة
رضا بملامح تبان عادية : ادعيلي براحة البال بس
و فهمت مقصده : ربي يريح بالك ، المهم انت درت اللي عليك و الحق انا خايفة عليك بعد كلام عمي السنوسي الاخير يا ريت ترجع لامريكا طالما موضوع السايح قعد قصة محكمة و تحقيق و قضاء اخر طلب ليك تشوفلي محامي كويس اتم معاه و ياريت يكون شخص عنده علاقات و فاهم كيف تمشي الامور
بعدم اكتراث للامر : يا ودي اهو قداش ليا ما وصل فيا شي
اعترضت ع كلامه : بالله عليك عاد انت قلت وخيتي و الله نخمم فيك طول الوقت و اكيد مرة عمي صاير فيها هلبة ساعدتني بارك الله فيك لكن حتى انا ما يرضيني تنضر بسببي دير فيا المعروف هذا و بعدها روح لامريكا
شاف لعمر : شفتها و الا تقولي روح لامريكا معناها ليبيا مش بلادي
تحشمت : و الله ما هدا القصد ،
: فاهم يا بنت عمي و اطمني انا ما يصير عليا شي باذن الله و حاضر اول ما انظم امور المحامي ح نسافر بس راهو راجع لان راجلك وعدني بزردة و اهني في الرابطة
