سنة 2020
فاتحة البوم صور و تتفرج
كانت كل صورة تحتها تاريخ
بينما هي منهمكة و تتفرج
: وين القيتيه هذا ؟
ضحكت : كنت ندور ع كتيب العائلة مش بابا قال يبيه القيت هذا ما احلاهم ماما الصور لكن ما عرفت حد فيهم
قدمت امها و فتحت الدرج و طلعت منه كتيب العائلة : امشي اعطيه لبوك قبل توا يحمق يقول تاخرتي
خذاته منها : طيارة و نجي
طارت بسرعة لبوها و اعطاته الكتيب : هاتي وينك ساعة نراجي
خشت تجري : ماما تبيني
ابتسم و طلع
و هي جت جنب امها : هيا ماما نبدوا من اول صورة هذه
حطت ايدها عليها : هذه صورة اصحاب جدك في عرسهم انا خذيتها من صاحبتي عفراء
متفاجاة : هادو صور اهلها يعني
ابتسمت : اي هذه حنينة صفية الكلام هذا سنة 1985 و هذا اللي جنبها اسمه ابوبكر راجلها
هي استغربت و قعدت تفكر
قاطع كلامها صوت امها وقت حطت ايدها ع الصورة الثانية : و هذه صورة امي كريمة و بوي منصور زي ما شفتي وقتها كانوا في العمرة
: ما احلاها اميمة
ضحكت : اي شفتي و هذه صورتي انا و خالاتك وفاء و وردة
بنتها مش مستوعبة انهم كانو يوما ما اطفال هكي : صغيرات كنتوا ماما
امها : شفتي و الا ...
حطت صبعها ع الصورة اللي بعدها اللي كانت عبارة عن صغار يلعبوا : باهي و هادو مني
اول واحد حطت عليه ايدها : هذا عمك عزالدين عرفتيه والا
ردت و هي متفاجاة : اللي كان يلعب في كورة ..
تذكرت اجمل ايام جمعتها بيه هو وعفراء : ايه ... هذا هو و هذه عفراء و هذه انا "ضحكت "
باستغراب : حقا ماما باهي وين انتو
ردت عليها : وقتها كنا في الرابطة في حوش جد عفراء طلعنا برا و لعبنا لعبة توا نشرحلك عليها يوم ثاني
بتفهم : باهي من اللي في الصورة هذه ؟
اشرت ع الراجل الاول : هذا جدك منصور و هذا ابوبكر صاحبه ......
و هذا عمك صالح ... وقتها كانوا يلعبو في كورة جميع
باستفهام : باهي وين مرته عمي صالح ؟
تذكرت اللي صار بس ما حبت تحكي لبنتها : هي ام عزالدين اللي قلتلك عليه و اسمها سعاد بس بعدين .....
بدت الصورة تضح نوعا ما
شافت صورة ثانية : باهي هذه منو
في اللحظة هذه تذكرت قداش مستاحشة صاحبة الصورة : هذه اسمها اسراء هي مش من اهني من بنغازي تذكرتيها مرة تلاقينا معاها عند خالتك عفراء
: اه اي اي تذكرتها يا ماما .... حلوة هي بس مش عارفة تحسيها زي المديرة
ضحكت لان فعلا شخصية اسراء قوية : صح هي هكي ....
اشرت ع صورة ثانية : باهي هذه صورة مني ؟
: هذه اسمها رجعة و تكون جدة صاحبتي عفراء و هذه اسمها عتيقة و تكون جدة عزالدين و هذه اسمها حواء و هي عمة اميمة صفية
حست ان راسها داخ : معش عرفت ..
ضحكت عليها و قلبت الصفحة
بنتها شافت واحد لابس بدلة عربية و متكي ع تلة صغيرة شعره لعند اكتافه: باهي هذا منو ؟ شكله راعي
تذكرت كلمة معينة و ضحكت : ايه اسمه السايح و يكون ولد حواء اللي شفتي صورتها توا
رجعت الصفحة : هذه اللي قلتيلي عمة اميمة صفية
: ايواه شطورة اهو بديتي تفهمي .... و توا خلاص مرة ثانية نقولك عليهم كلهم و شني حكايتهم
حطت ايدها ع صورة : و هذا عرفته بابا و الا
عيونها لمعوا لتذكرها امتى خذت منه الصورة هذه : صح ... و يالله خليني نمشي نكمل اللي وراي
بنتها : بس بتحكيلي راهو
اشارت ليها بموافقة
بنتها طلعت و هي ضمت الالبوم ليها و سرحت في ايام من اجمل سنين العمر ❤️❤️❤️❤️❤️
(هالمرة قدمت الشخصيات بطريقة مختلفة و مع احداث الرواية ح تتعرفوا عليهم اكثر و اكيد مازالوا ما كملوا الشخصيات عندنا )
تحياتي مارية علي الخمسي ❤️❤️❤️❤️
