( اسفة ع التاخير لدقائق معدودة. بس زي ما ح تشوفوا الحلقة طويلة ... تحياتي لصاحبة الصورة Maria Abdo)
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
وخاطري بعد نلقاك ما تحكيلي
خليني وانا نفهم كلام اعيونك
في ارموشن نبي انحط رحيلي
نين من اشواقي ينتفض مكنونك
وايطير الزعل منك ويرحل ليلي
وايبان صبحنا وينما ايقابل عونك
وانقولك قصايد شعر وأتغنيلي
وايحيد كل شي من قبل حايل دونك.
خربشات.
محمود اكنيش.
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
اول ما عبى الرصيد حط ع رقم فريدة و دار اتصال
ع جهة الثانية كانت فريدة مع امها و بعد وصول هدى من حوش حسين
هدى كانت كيف سامعة بسفر عفراء : اي كيف الحال و شني قصة السفر متاع عفراء هذه
فريدة : ما فيش قصة خيرك انت ماشية لتونس تراجع ع رجلها و تشوف روحها بعد الحادث
هدى : اماله علاش كل العيلة غادي وجوههم مقلوبة و بالذات صفية طول الوقت راقدة و كان كلمتيها ما ترد عليك اي حتى وقت طلعت بتروح ما سلمت ع حد ..انا خلاص معش فهمت في الاول مشت صالحة و عمر و معاهم بنته و ولدها و لتوا ما في عليهم اخبار و توا بنت صفية نحس في شي وراءهم خوالي مش بلاش
حواء : ترا اسكتي ما في شي فكيني من دعوتك
رن تيليفون فريدة ابتسمت : هذا السايح ... اسكتي يا هدى مش عارف ان خطيبته في تونس لان ما نبوه يسمع بالحادث
قلبت عيونها : باهي فهمت
ردت : اهلين سايح
: اهلا فريدة كيف حالك انت و العيلة كلهم
فريدة مستغربة كيف امها ما طلبت تكلمه زي العادة : الحمدلله اهو عند امي و حتى هدى جنبي تسلم عليك
السايح يتكلم مستعجل يبي يتخطى المقدمات : عليك و عليهم السلام ... اسمعي ترا اطلعي كلميني بروحك نبيك
وقفت و طلعت برا
هدى : و ليش ما طلب يكلمنا بكل و بعدين شني في بينهم لين طلعت تكلمه برا
حواء بتعب : تقدري تسكتي و ما تدخلي بينهم ع كيفه امتى ما يبي يكلمنا ع راحته
سكتت هدى و فشت غلها في بنتها : تعالي هنا يا بنت
و حواء تخمم في اللي جاي
فريدة حاولت الان عادية : ما في شي خيرك انت قلتلك حسين ولد خالي تعب و مشي لتونس و معاه خالي خميس بس
السايح : بالله ما تبهلوني خيركم هكي كل واحد يقول في كلام توا كان ياسين يكلم فيا و ما قالي ان حسين مريض و قالي ان خالي هو اللي مريض فهميني
