سيبتني
وانا اللي بقلبي غاليتك
وبعتني
و نا اللي بالغالي شريتك
كيف هنتني
و نا اللي حبيتك
خليتني
و بايدك هدمته بيتك
جرحتني
و انا اللي وديتك
(كلماتي )
__________________________________
لاحظ ان جسمها رزن عليه و وقت شافها كانت راقدة
باسها ع جبينها لعند دموعه نزلوا عليها
و من ثم استمر يبوس و يشم في اطفاله
و اتكى جنبهم يتفرج عليهم لعند... رن التيليفون برسالة
"انزل نحنا تحت "
ثلاث كلمات كفيلة بكتابة النهاية لقصة جميلة بدأت برضو بكلمة بسيطة من بنت بسيطة (ياناعليا )
كلمة حبها بيها و حبها منها و يا روحي قداش هي حبتها منه بلكنته الخاصة
معش بتسمعها منه و لا عاد هو ح يسمعها
و لو جت غير ع الكلمة هذه يا باسل الامر محلول
لكن لو تعرف بس نتيجة الانهزامية اللي انت فيها حاليا
كيف ح تكون؟! ابدا ما تجرات و خذيت خطوة زي هذه !!
رجع باسهم ثلاثتهم يمشي و يرجع يشوفلهم قلبه مفطور عليهم مش قادر مش قادر يمشي و يسيبهم
حس ان حد جبد قلبه في اللحظة هذه خلعه خلع بعروقه من بين ضلوعه : ااااه ...
رن التيليفون ثاني اللي كان ع الوضع الهزاز ليعلن عن ساعة الرحيل
الهجرة و ربما الموت
المهم في الامر انها لحظة فراق 💔
يمشي و يردد " يالله ... يالله .. دخيلك يا الله"
خذي متعلقاته و غمض عيونه بقوة و فتح الباب و نزل بسرعة كبيرة من الدروج و هو منزل طاقيته ع وجهه فتح الباب و ركب
: اي ده يا عم انت فين كل ده
: ليكني اجيت
و من صوته عرف هو و اللي معاه ان حزين هلبة
و طبعا موقف زي هذا مش ح ياثر فيهم لانهم متعودين
عاد ما قالو عليهم تجار بشر من فراغ !!
طول الطريق و هو يتفكر و بس ربما في النقطة هذه تشارك مع عزو نوعا ما في مواجهة هجوم الذكريات ....
الفرق ان عفراء في من معاها و حواليها
صح عفراء اصغر بس في معاها عيلة
لكن اسراء يا باسل من بعد ربي ما عندها حد
و فوق هذا كله عندها مسؤولية اطفال في رقبتها
في مجتمع قاسي تحكمه عادات و تقاليد البعض منها في تناقض تام مع الدين و لكنها تظل ذات سطوة ع اهلنا في ليبيا
هذا غير قانون البلاد اااي ما يعطي اي حق لاي ام ليبية اعطاء الجنسية لاطفالها و لا تكفل لها الدولة اي حقوق بداية من الجنسية للجواز للعلاج للدراسة الجامعية و غيرها من امور اخرى ضرورية لعل اهمها التعامل في الشارع كيف بيكون معاهم و في اكثر من مكان و نحن الادرى باطباع بعض اهلنا للاسف ...
و بعد مرور ساعة من الزمن
ستون دقيقة فقط انهت حلم سنة و كأنه لم يكن
في قارب صغير مكتظ بمختلف الجنسيات
العربية منها و الافريقية
بدات الرحلة بيهم بقارب يجري بيهم بموج كالجبال
