(السلام عليكم نعتذر ع التأخير لكن امس صار معاي ظرف و انشغلت .. قراءة ممتعة ❤️❤️❤️)
_________________________________
رأيتُها عند الصباح المنجليِ
سألتها مااسم الغزالِ الأكحلِ
فصوبت إلي سهم لحظها...
قالت إذا عرفتهُ فأنت لي...
مربَّعٌ في فيه سنٌ واحدٌ...
وذيلهُ كالوجهِ لم يبدَلِ...
وإن قتلتَ حُوتهُ في جوفهِ...
فواحدٌ من ستةٍ لم يُكمَلِ...
فالبسه إن تُرِد بهِ تجملاً...
واقرأهُ في قول الإلهِ المُنزَلِ...عفراء بعد لقاء والغياب
(كلمة الحق )
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
هي هلبة امور ما فكرت فيهم زي العدة و زي وين بتقعد بالضبط كل ما في بالها انها ح تمشي لحوشها و تقعد فيه ما كانت عارفة ان في نقاش محتدم صاير بين الكل ع النقطة هذه
بس حسمها خميس بكلمة وحدة وقت قال : البنت بنتنا و اللي فاقدينه ولدنا اذا كان ميت فعدتها تمسكها عندنا لعند تجيب الحي و ان كان عايش و ربي يفرحنا برجعته يروح يلقاها في بلاده تستنى فيه يعني لا ح تمشي مع امها و لا معاكم يا امحمد سامحني انت سيد العارفين
امحمد بموافقة لكلامه : و انا ما عندي بعد كلامك كلام و اللي تبيه عفراء يصير لان راحتها عندي بالدنيا
وارتاح خميس لان مش عاطي اي اهمية لكلام صفية بس كان متخوف من موقف جدها و اعمامها :يبارك الله فيك تعرف الاصول من يومك و البنت ما تبي تفارق البلاد يا حاج
المهدي : احني تكلمنا معاها بروحنا و هكي قالت و طالما هدا قرارها خلاص معش حد يتدخل فيها
و صار الاتفاق هذا بينهم و بحضور اسماعيل و اشرف و عمر و حسين بس تبقى امر واحد هي وين بتقعد و بعد مشاورات بينهم توصلوا ان انسب حوش تقعد فيه هو حوش عمر لانها حامل و تحتاج عناية خاصة تبي معاها حد في الحوش يعني صعب تقعد عند خميس بروحه و حسين باعتبار معاه اولاده برضو صعب تقعد عنده و كلا صالح و صفية كان الكل متوقع انهم مسافرين طالما بكار ما جي معاهم
و عفراء اول ما وصلت لحوش اسماعيل تتفقد في كل زوايا الحوش كيف تنسى شخص موجود في حياتها من طفولتها و في الحوش هذا بالذات ذكرياتهم لا حصر لها وين ما تمشي تتخيل فيه وقت كانت تقوله عمو الراعي ...
و كيف صار فيها بعد شافت امه لا عرفت تزعل منها و تعاتبها و لا عرفت تشفق ع حالتهم الاثنين لان المفقود غلاوته كبيرة عندهم الاثنين
حواء وقت جو عيونها عليها فتحت ايديها و كأنها هي بس اللي مشاركتها الالم و كأن هي بس اللي بتحس بوجعها و هي بس اللي في ايدها الدواء للوجع هذا: تعاليلي يا بنتي ، تعاليلي يا غلاه و عيونه مشي و هو يفكر فيك و يوصي عليك قالي يما ردي بالك عليها قلتله توصي عليها و ديما تخمم فيها قالي انت اللي عارفة كل شي يما و ايه انا عارفة في حياته ما حب حد كيفك و لا تمنى ينول حاجة كيف ما تمناك و يوم اللي طالك انا انا نكدت عليه و عليك لعند طار و مشي و ما عاد طلته لا انا و لا انت تعالي يا بنتي تعالي
