( نعتذر عن التاخير بسبب ظروف العمل و ظروفي الصحية حفظكم الله من كل شر ❤️❤️❤️)
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
عليك ان لا تعلن ع الوصول
الا عند رؤيتك ختم الدخول
الدخول الى قلب احدهم
الدخول الى عقله
الى وجدانه و كيانه
يحتاج الى الكثير من التاشيرات
عندما تنالها جميعها
حينها فقط تستطيع القول انك وصلت
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
بداية و في المطار ... مطار طرابلس العالمي و في احدى مقاهيه
ابراهيم عرض ع صالح ان يتكلموا مع بعض
و بالرغم ان بكار بادي يكبر عنده حس عالي بالادراك ما حد منهم لاحظ الشي هذا
ادراك الاحداث المتتالية من حوله ... بداية بشعور سلبي متزايد اتجاه كل من ابراهيم و سيرين ممكن بحس طفولي صرف النفور هذا ناتج من احساسه انهم خذو منه شخص مهم و اللي هو عزو و ممكن تكون فطرته البشرية نبهاته لشيء ما سيحدث في قابل الايام .. بس فعلا نظراته كانوا مربكات لابراهيم اكثر من الكلام مع صالح نفسه
لهذا تحاشى النظر اليه و تكلم مع صالح مباشرة : ممكن نتكلموا في موضوع بشكل جدي بعيد ع عزالدين و بعيد ع بنتي و اللي صار من احداث في عرسهم
مستغرب طلبه : تفضل نسمع فيك مع اني مستغرب الحق لاني و زي ما فاهم ما في شي بينا غير ولدي و بنتك
ابتسم : عارف بس انا طامع في اكثر من هكي و ان شاء الله ما تردوني يا خوي صالح
اول ما سمع منه الكلام هذا زادوا علامات الاستفهام كبروا في راسه : ما فهمتش كيف بنردوك ؟
و بدون مقدمات : نبي اختك يا صالح
بتلقائية و ناسي تماما وجود بكار : اختي انا صالحة
كانت ابتسامته دلالة ع ان الكلام صح
بس لحظة شوفوا بكار شنو قال : عمتي صالحة لا ! انتم خذيتوا عزو عمتي صالحة لا
ابراهيم وجهه تغير
و صالح تفاجا بولده ا او نبهه ولده بوجوده معاهم : بكار
بيبكي خلاص لان مش متقبلهم باي شكل ..لكن بعد صوت بوه التحذيري سكت
حاول ابراهيم يرطب الاجواء : طفل و تصرف بتلقائية عادي ما تدورش المهم انا حاليا قاعد اهني لمدة شهر ممكن و ما دابيا نكمل الموضوع قبل نرجع لصربيا و للعلم انا مستقر غادي و انت عارف يعني ع شان اختك يكون عندها معرفة مسبقة بالمكان اللي ح تعيش فيه
صالح نفسه ما كان محبذ الفكرة : انا مش من حقي نوافق او نرفض هذه حياة اختي وهي صاحبة الشان في الموضوع بس راهو حتى عمي خميس ليه راي معاها خلاصة الكلام ان الموضوع بياخذ وقت لازم توسع بالك معانا
رد ابراهيم حسس صالح ان متمسك بيها : و انا ما عنديش مشكلة نصبر عادي ...
حط القرصون القهوة قدامهم : اشرب قهوتك
