نهاية اليوم هذا
وصلت سعاد و هي مش ناوية ع خير
سلمت ع الكل لعند وصلت لصفية : مش عارفة لوين بتوصلي انت و راجلك ليش ما تخلونا في حالنا!!
صفية بترد بس .....تدخلت بنت عمها صالحة و اللي تكون حماة سعاد : اسمعي يا سعاد فكينا من المشاكل هذيما حاجات تريس احني ما دخلنا فيهم مشاكلك مع صالح حليهم في حوشكم
شافتلها بغيض و مشت قعمزت في جهة بروحها
و صفية كانت عارفة من البداية ان هذه ح تكون ردة فعلها و هذا اللي خلاها تعترض ع الموضوع من بدايته
ع صفيح ساخن مرت باقي ساعات اليوم
و بسلام نوعا ما تناولوا وجبة العشاء مع بعض
و حضرت حتى حواء عمتهم هي و بناتها الاثنين وحدة عمرها (12 سنة و اسمها فريدة و وحدة عمرها 9 سنين و اسمها هدى )
اثناء العشاء و باعتباره يوم الجمعة عادة تكون القناة التونسية مليانة برامج رياضية و وقتها كل الليبين عندهم شغف بالمباريات و البرامج التونسية بالذات اللي تعقب كل مباراة سوى في الدوري التونسي او الدوريات العالمية
عزو واقف ع السطوح : ها يا بوي صافية توا
بصوت عالي : لا تمشي و تجي ترا زيدها يمين شوية
بتذمر : ماهو كان زي الناس راهو شرينا الصحن حتى البث ما باش يطلع عندنا ... (على صوته) و توا شنو
طلع حسين برا. : خلاص يا عزو طلعت طلعت
نفخ : واخيرا
و نزل بسرعة ع شان يلحق ع البرنامج
و عاد غرامه كانوا الطليان
صح فريقه المفضل هو اليوفي بس يحب يتفرج حتى ع باقي الفرق
و اللاعب الافضل عنده ديلبيرو
كان في خياله يشوف في نفسه في ملاعب بالحجم هذا و يسجل في الاهداف
لعند : عزو يا عزو
انتفض جسمه و فاق من خياله : هاه
ضحك عمر "خال عفراء ": خلعتك عقلك معاهم عارف برا شوفهم ع الشاهي
عزو طلع و مازال عقله معاهم
دخل للحوش و جاب الشاهي مدهولهم ورجع تصمم قدام التيليفيزيون
باختصار كانت لمتهم حلوة و جميلة
يومها عفراء تعرفت ع الكل و لفتت انتباههم بخفة دمها و حركتها في كل مكان
بس اللي ما كانت عاجبتها تصرفاتها هي جداها رجعة و هذا لانها كل شوية تهرب و تطلع عند الرجالة تبي تتفرج مع بوها بس خوالها يدخلوها و يعاركوا و يعلقوا ع بوها اللي مش مدور الحاجة هذه بالعكس يعارض فيهم و يبيها طول الوقت جنبه
ليلتها و بعد نوم الجميع
و اللي هذاروح لحوشه روح
عفراء طلعت برا تبي تمشي لبوها متعودة كل ما تقلق في نومها ترقد جنبه بس شافت عزالدين في المساحة اللي بين حوش جدها و حوشهم ينطط في الكورة
