قبل ساعات
تاخر ع غير عادته في الفيقة اليوم
و لانها استغربت تاخره : فافي انتم اليوم بتمشوا مع عمك منصور والا ؟
عفراء تسكر في شنطتها و هي خايفة امها تلاحظ اللي تخفي فيه فيها : اي ماما و بابا بيروح بينا
صفية شدتها من ايدها ع شان تمشط في شعرها : باهي خلي نوتيك بسرعة و نمشي نشوف بوك مش عارفة خيرا تاخر
عفراء التفتت ع امها : عادي ماما نمشي انا انوضه
ابتسمت : اممم عادي ... خلي نكملوا قبل و اسمعي يا بنتي لعب كورة مع الاولاد لا ساد امس مروحة مضروبة شوفي قريب جت في عينك
عفراء تبي تبرر : ماهو يا ماما كانوا بيديروا فينا قول و انا طلعت الكورة براسي مشي ضرب وجهي في العارضة و جت الضربة جنب عيني
بتهكم : و تقولي فيها فرحانة ؟
عفراء بثقة : المهم ما دخلوا فينا قول و الضربة ع كيفها تصح و نكبر و ننساها
صفية بحركة لا ارادية شدت شعرها بقوة : لا حول و لا قوة الا بالله
عفراء : اااه يا ماما خيرك
صفية : يعني هذه حسيتيها لكن ضربة العارضة ما حسيتيها
عفراء ضحكت: اي ماهو هاديكا كنت ساخنة و فرحانة اني طلعت الكورة
بعد كملت تسريح شعرها : نوضي بالله عليك ركبتي ضغطي
عفراء وقفت : باهي بنشمي انوض بابا انا
طارت جري لبوها
كان متكي ع سريره
جت و قعمزت جنبه باساته ع خده : صباح النور بابا
مبتسم ليها و عيونه فيهم دموع و نظرة صعب ع طفلة زيها تفهمها : صباح الورد ع وردة بابا ... واتية بنتي ؟
عفراء تلعب بشعره : اي شوية و نطلع لعمو منصور
غمض عين وحدة : يعني ما تبي بابا يوصلك
عفراء ضماته : لا مش هكي لكن دوره اليوم ... مش انت بتروح بيا بعدين و بتاخذني للفروسية "بصوت واطي" دسيت حوائجي في الشنطة عن تشوفهم ماما "
ضحك لعند دمعوا عيونه ثاني : حاضر يا فافي نمشوا للفروسية
بفرح : اي ماهو حتى وجدان تبي تجرب تركب قالت عمو منصور قاللها عادي تتعلم زيي تركب ع الخيل
باس ايدها بقوة : كل شي تبيه نديره لكن حتى انت يا بنتي لازم تسمعي كلام امك و معش تدسي عنها شي خليك ديما قريبة عليها باهي بابا
عفراء بحب : باهي
بيييب
حطت ايدها ع خدها : حيه هذا عمو منصور جي
شدها من ايدها و طلع معاها شاف صفية في المطبخ : صباح الخير
صفية : صباح النور فيسع ماما عمك منصور برا
