(ح يكون في تابع ممكن ينزل متاخر او بكرا باذن الله ، سامحوني ع التقصير بس يعلم الله بحال التعب و المرض بعيد عنكم )
__________________________________
ما كانت عادية ابدا في نظر الجميع كانت تلمع و تتلالا كالنجمة بل كالقمر كما وصفها السعادة مربوطة باشخاص يصنعوها بدخولهم في حياتنا وقت يغيبوا تغيب عنا و وقت يحضروا اكيد ترافقتا
و حاليا كل ما تمشي كانت هالة السعادة تمشي معاها و تضوي في كل مكان حواليها
الغذي اللي يعولوا عليه ما خلت ما دارت فيه و اي شي يحتاجوه تقول نجيبه
فجاة شافت اكثر من يحس بيها و بسعادتها
وجدان من عند الباب : روروروي ، يا و الله نهار مبروك يا وخيتي
و طارت عندها و شاركتها فرحتها و هي بين احضانها: ردت فيا الروح يا وجدان الحمدلله ربي حن عليا و رده ليا سالم و الله لعند توا ماني مصدقة
و رجعت تزغرط ثاني : طيب فيك غاليتي طيب فيك الحمدلله ع الساعة هذه تستاهلي كل خير
تفكرت انها قاعدة واقفة عند الباب : سامحيني تعبتك و خليتك واقفة تعالي خشي سلمي و ارتاحي
خشت وراها و تتكلم : الصغار خليتهم عند وفاء في حوش اهلي قلت اليوم نهدرزوا ع راحتنا
: يا ريتك جبتيهم
وجدان : لا يا حنه خليني بنهدرز معاك ع راحتي
و كانوا وراها كل من كريمة و وردة
كريمة اللي وقت وصلهم خبر الوفاة كانت مسافرة علاج هي و راجل بنتها وفاء حضنتها اليوم و عبرت ع حزنها ع اللي عاشاته من قبل و فرحها بفرحتها اليوم و لانها رفيقة امها طبيعي الحضن يكون فيه عاطفة الامومة : سامحيني يا بنتي هذا وين جيتك يعلم الله ان العقل كان معاك
و هي في سرها حتى امي ما جتني : حاشاك يا خالتي كريمة عارفة و عاذرة
دورت بعيونها : ما جتش امك ؟
بحزن كبير : ما جتش قالولي في مشكلة في جوازها مش عارفة علاش لعند توا ما انحلت
كريمة : ان شاء الله خير اكيد بظرفها و لو قدرت مستحيل تقعد عنك
سايرت كلامها : اي صح تفضلي
و من بعدها سلمت ع وردة : الحمدلله ع سلامته وان شاء الله تنذكر و ما تنعاد
و فرحت بجيتها لان ليها فترة عليها : الله يسلمك ، انستينا و ان شاء الله تنوضي بالسلامة
: ان شاء الله يارب مازال انا مطولة
و دخلو للحوش و بدت رحلة سلامهم للباقي
اما برا السايح كان ولده بين ايديه و مش راضي يفارقه
و اشرف : يا راجل مش باهي حتى شمس عليه توا يمرض راهو
السايح ضامة في حضنه : انا اهو قعمزت داخل ما عنده وين بيشوفها الشمس
