السلام عليكم جميعا .... نتمنى تكونوا بخير ❤️❤️❤️
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
مشهد اضافي ...
مقعمز يتفرج ع مبارة كرة قدم في الدوري الانجليزي و معاه كالعادة بنته نزيهة اللي تحب تشاركه كل اللحظات هذه و اكيد شقيقه بكار ...
و خلال دقايق المبارة كان في اشتباه بلمسة يد داخل منطقة الجزاء و اشتبه الحكم بوجود ضربة جزاء ...
و صار نقاش بينهم
بكار : و الله ما فيها حاجة واضح تمثيل يا راجل الكورة بعيدة ع ايده
نزيهة : لا يا عمو مش واضحة
ضحك عزو : انت غير لانك تشجع في مانشستر ما تبي تقتنع
بتحدي : توا يبان مع الڤار و تشوفوا !
عزو : توا نشوفًوا
و اتجه الحكم لغرفة الڤار و بعد اعادة اللقطة لاكثر من مرة تبين ان ما فيش لمسة يد و لا يوجد ضربة جزاء
بكار شاف لخوه : مش قلتلك انا ما فيش ضربة جزاء
ابتسم بوجع : ديما متسرع يا خوي ، لو كانت التقنية هذه موجودة في حياتنا تتوقع ان حياتنا تتغير للافضل ؟
ردت نزيهة : بابا مش قلتلي ان لو تفتح عمل الشيطان ؟
اشر بكار براسه : رد عليها توا
ضحك و ضمها ليه : صدقتي و بعدين يكفيني انت ع شان نرضى بحياتي
نزيهة : و خويلة وقار و البيبي
اشار بموافقة و تاكيد ع كلامها : و خويلة وقار و البيبي
بعدها طلع وتأمل شجرة الموز و انهالت عليه الذكريات
انتهت ....
مارية علي الخمسي ❤️❤️❤️
_________________________________
بداية فكرة الرواية كانت و للامانة قبل حتى ما يوصلوني القصص من اصحابهم فكرة الرواية جتني من مناشير شفتهم في بعض القروبات ع لاعبين ليبيين في فرق مختلفة و للاسف اصحاب المناشير بنات
المناشير كانوا يا اما معاهم صور يتم تعديلها بحيث تظهر اصحاب الصور من لاعبين في هيئة بنات للاسف بوضع ميك اب او مجوهرات و الغاية من كل هذا الاشارة اليه بأنه فتاة اي امراة يعني تهين غيرها بصفة فيها !
و للاسف هنالك ماهو اسوء ففي بعض المناشير وجدت صورا لبعض اللاعبين اثناء لعبهم الكرة و بشكل عفوي من زملاءهم او منافسيهم يتم تجاذب الثياب فيظهر البعض في صورة غير لائقة ! و الشيء بالشيء يذكر ... ع عهدنا احني نتفكر مناظر زي هذه نتحشموا منها حتى خلتنا في احيان كثيرة ناخذوا قرار بعدم مشاهدة المباريات مع اباءنا و اخوتنا بس اليوم نلقاهم ينزلوا المشاهد هذه و عليها تعليقات مسيئة لاصحاب الصور و برضو من بنات و في قروبات بنات
و لا وحدة فكرت ان اللاعب هدا عنده عيلة و زوجة و اخوات و بنات عنده اهل يتأثروا اكيد باساءة من النوع هذا
هو نفسه شنو ممكن يكون شعوره وقت بنات قاعدات ينقلوا في صوره و هو بالوضعية هذه !
و لا وحدة فكرت ان امهات هولاء اللاعبين و عائلاتهم يدعوا عليهم و حتى يتحسبوا عليهم في احيان كثيرة ،
و مناشير من نوع اخر ، فريقي فايز نقعد انزل في عبارات سب و شتم للفريق الخصم و نوصفهم باوصاف بذيئة هما و كل من يشجعهم ، علاش ؟ ماهو انا هدا فريقي و نحبه هلبة و هدا الطبيعي
لا ، مش هدا الطبيعي اذا كان مش مقبول و لا مسموح عند الرجال كيف وانت بنت تنزلي و تتنمري ع خلق ربي و ع مؤسسات رياضية في عندهم جمهور من عمر اجدادنا
كيف مقبول و انت تسيئ لشباب اهلهم يشوفوا فيهم بالدنيا
لعند من قبل كم يوم كان في مبارة بين فريقين و في لاعب مجرد ما دخل حصل اصابة فقد الوعي و من خوف زملاءه ما انتظروا النقالة و طلعوه لخارج الملعب بعدها يتم تداول الصورة في قروبات نسائية من بنات و يكتبوا عليها (اما تديري حنة و تبي الحمام...)
الموجع ان اللاعب هدا كان متعرض لارتجاج في المخ و اصابته خطيرة ... و الصورة محتفظة بيها عندي لكن ما قدرت انزلها لاني ح نساهم في نشرها و ممكن حتى انتم مرت عليكم ...
عمره ما كانت اخلاقنا هكي و لا ع هكي تربينا
يا ريت كل وحدة قبل ما تتنمر او حتى تسب تفكر لو كان الشخص هدا يقربلها كيف ممكن تحس !! و اعتقد ان كل عائلاتنا فيها افراد من كل الانتماءات في اللي يشجع في الفريق (س) و في اللي يشجع في الفريق (ص)
ممكن تكلمت هلبة بس فعلا الامر مؤسف ... المهم و انا نفكر في القصص هذه نحظى بحاجة اسعدت قلبي تواصل عفراء معاي و بدت تحكي في قصتها يعني كنت ندور فيها في السمي القيتها في الوطى و من بعدها و عن طريق عفراء وصلت في اسراء و اخيرا تواصلت مع وجدان و بدت رحلة الڤار اللي كانت نوعا ما مختلفة حاولت قدر الامكان معالجة عدة قضايا
و من اهني كان عندي دافع قوي نكتب حاجة تخص الرياضة
و القضايا الاخرى اللي ناقشتها الرواية في نظري مهمة مثل زواج الليبية من اجنبي و كيف يتم حرمانها من كل حقوقها هي و ابناءها لان بخروجها من كتيب العائلة الخاص باهلها خلاص تخسر حقوقها ... هدا غير الاذى الاجتماعي ... و ممكن اسراء و ع لسانها قالت كنت محظوظة جدا بوجود طارق الفستري في حياتها و برضو بظهور السايح و من ثم عفراء و اهلها في حياتها لكن في غيرها من القصص المأساوية لامهات ليبيات يعانو الويلات بسبب جنسية اولادهم غير الليبية ....
نتمنى نسمع منكم اي شي تعلمتوه من الرواية و برضو لو عندكم اي ملاحظات انتقاد استفسار مرحبتين بيكم ....
مع تحياتي
مارية علي الخمسي ❤️❤️❤️❤️❤️❤️❤️❤️❤️
