(نعتذر ع عدم التنزيل امس و حاولت اني نعوضكم اليوم بجزء طويل من الحلقة الاخيرة ... يعني مازال في ليها جزء ثاني ... عندي ملاحظة وحدة .. في ناس اتهمتني بتكرار الاحداث متناسين انها قصة حقيقية و متناسين برضو ان في حياتنا في مشاكل عادة ما تتكرر معانا ... و في اشخاص يؤذونا في حياتنا بذات الطريقة بدون ما يتعلموا من اخطاءهم و في برضو اللي وصفوا المشاكل اللي تتعرضلها الشخصيات بأنها سطحية ! زي المشاكل المفتعلة من حواء ، المفارقة اني الكثير من متابعاتي الحبيبات بعثولي ع النوع هذا بالذات من المشاكل و انهم عانوا ويلات منه و في اللي وصل الامر للطلاق بعيد عنكم !! فهل مشاكلنا الاجتماعية اللي من النوع هذا تشوفوها سطحية ! و في عندي قارئات برضو كلموني ع قصة عفراء بالتحديد بداية من اهتمامها بالرياضة و نهاية لتاثر حياتها بالوضع السياسي لعمها بانهم عاشوا نفس المشاكل لدرجة وحدة قصتها مقسومة في التشابه بين عفراء من ناحية الرياضة و بين اسراء من ناحية الزواج باجنبي و قالتلي لدرجة شكيت انك تتكلمي عني بالتحديد ! انا عن نفسي توصفي كتابتي بالرديئة عادي ما يهمني كل حد و رايه و كوني ما عجبت البعض باسلوبي هدا حرية راي ! لكن وصف الشخصيات بان مشاكلهم مش مهمة و هما قاعدين يتابعوا في الاحداث الامر جارح هلبة راهو و يصير الامر انتقاد و ليس بنقد ابدا ! و لاني خذيت عهد مع اصحاب القصة نكملها لعند وين نا هما يبو ح نلتزم بعهدي حتى وان شاف البعض ان الاحداث مكررة ... و في نهاية الامر شكرا لكل من قال كلمة طيبة في حقي و في حق الرواية و الشكر موصول لكل من قال كلمة نقد و ليس انتقاد في حق الشخصيات ...❤️❤️❤️)
__________________________________
لكل بداية نهاية و عادة خلال رحلتنا في الحياة عموما تسبقنا خطواتنا للوصول للتالي و عند وصولنا ما نفتيء ان نفرح بهذا الانجاز حتى نتحسر ع الماضي ...
خلاصة القول ان الرضا و السعادة من الصعب الوصول اليهما في الحياة الدنيا
🌸🌸🌸🌸🌸🌸🌸🌸🌸🌸🌸🌸🌸🌸🌸
كان ولدها يبكي في صوت واحد و مش راضي يسكت : بالله يا سايح شوفه مش فاضية بيه بكل نبي نطمن ع عمي السنوسي قالو تاعب من امس خايفة عليه هلبة
خذي احمد في حضنه و كله قلق و خوف عليها من الضغط النفسي اللي معيشة نفسها فيه : حاضر بس غلط الضغط النفسي اللي عايشة فيه اهو المرض وصل لليبيا يعني من اول ما طلع و انت يا تفكري في بكار يا اما في حوش جدك متوقعة بتشدي عنهم المرض لو قعدتي تاكلي في روحك
متجاهلة كلامه : اهو رد ... عمي المهدي طمني بالله عليك
ورد المهدي بصوت يعكس مدى سوء الحالة اللي فيها عمها : يستر الله يا بنتي انت ادعيله بس و ربي يخفف عنه
حست بخوف شديد : شنو معنى الكلام هذا يا عمي ؟
: ما فيش ليه الا معنى واحد قاعد في العزل و تاعب و اهني يا بنتي قانون ممنوع حتى الاختلاط بيه نسالوا عليه بالتيلفون بس و ان شاء الله ربي يسمعنا عنه الخير
