(شكرا لكل من سال عني و عن صحة بنتي الحمدلله في تحسن ملحوظ مازال مستمرة ع المضاد و باذن الله خير ... هذا اللي قدرت نكتبه اليوم و باذن الله قريبا نرجع نكتب حلقات اطول )
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
جرح من اعطيتهم مساحة لا محدودة من الامان قد يكلفك عمرا كاملا و ان تستيطع النسيان ....
_________________________________
طول الطريق و هما مروحين و صالح يسال فيها و هي ما ترد
كانت شعلة ملتهبة من الغضب
شي واحد كان لازم تسال عنه لان في بالها هدف لا يمكن التنازل عنه : جي الراجل و الا لا ؟ يعني اللي بياخذ الرسالة !
استغرب سوالها عنه: احم جي الصبح و خذاها فجاة هكي و انا طالع تبعني لعند المحل و بعدها وقفني قالي اعطيني دخان قلتله ما اندخن مشي قالي جيب الامانة متاع بنت ابوبكر .. خلاص مديتهله خذاها مني و مشي ع حاله .. انت ليش تنشدي
ما قدرت ترد تبي تتماسك لعند تروح بس حاب اكلها لضياع فرصة ان تسنح مرة اخرى
صالح بقلق : عفراء بنتي خيرك
بدون نية: ما فيا شي نفكر في مدرسة بكار
بكار حن عليها : انت تعبتي فافي عادي نروحوا للحوش نبيهاش المدرسة انا المهم انت فزتي اليوم
فكرت في الشي اللي كانت مصممة تديره و كيف كان ممكن ياثر ع بكار دموعها نزلوا و تكلمت : لا حبيبي نمشي معاك فداك التعب كله
و صالح مش حاس خير ابدا و خايف عليها هلبة لان عمرها ما كانت تتعامل معاه بالطريقة هذه ! غريبة
و بالذات وقت فشت كل غلها في الابلات متاع خوها الاثنين
: معليشي مع كامل احترامي ليكم الاثنين و ليك انت استاذ بس انتم اهني ابلات مش اولياء امور تحموا في صغاركم و تضربوا اي حد يتعارك مع صغاركم مع اني متاكدة ان خوي ما دار شي بس حتى لو دار مش من حقك تعاقبيه طالما ولدك طرف في الموضوع معقولة تخلوا طفل في العمر هذا يكره المدرسة بسبب تصرفات زي هادي..
: لو سمحتي خوك شيطان مش زي ولدي كيف تبيني نسكتله
ردت عليها بتهديد : ما تقولي ع خوي لفظ زي هذا اصلا لو انت ابلة و مربية اجيال ما تقوليها الكلمة هذه اول حاجة و ثاني حاجة هادو صغار يا ناس يتعاركوا و يتراضو و اللي مش قادرة تحز مشاكل اطفال من هالنوع ما تقربهم يعني معقولة صغاركم في الحوش ما يتعاركو
صالح شدها من ايدها : خلاص يا بنتي اهو الاستاذ ح يدير حل
تكلم المدير اللي يعرف صالح : باذن الله و ما حد يتعرضله مرة ثانية و بالذات انتم يا ابلات طالما صغاركم في الفصل
عفراء : انا مش ح ندير خير لو صار موقف زي هذا و لو تبوها حلبة مصارعة جاهزين حتى احني
صالح بدي يطلع فيها : سامحني يا خوي غير واجعها خوها بس
