كتمان [ مكتملة ]

الحلقة 1

".... خاطيني مانيش انا..... بعدي عليا هئ هئ يما ارواحي متخلينيش معاها...."
ونفس المنام قاعد يتعاود كل يوم، نفس السيناريو ونفس العبد..... نفس الوقت لي نوض فيه كل يوم، الثلاثة تع الصباح.... السكات لي نحبو والوقت لي يعجبني فاليوم،... منسمع صوت حتى واحد... أنا برك.... الطاقة كانت تتحل وتتقفل.... نضت قفلتها بزربة بش مينوض حتا واحد ويقلقني..... شكون لي يقول بنو هادي الدار الساكتة هي نفسها لي تكون فالصباح....الحس والهدرة والعياط.. وانا لازم نحط الكيتمان كول يوم بش نسمع حتا صوت... هادي هي دار العايلة...
دقيقة.. دقيقتين نصف ساعة، ساعة وساعتين محسيتش بروحي وانا قاعد نتفرج فالسما والبرد يضرب فيا من كل جيهة... لوكان برك كنت نقدر نعيش في عالم وحدي واحد ميهدر فيه كامل ساكتين...و جامدين ندير فيهم وش نحب.... كنت رح نرسم لوحات فنية... بدمهم ههه ومن كل واحد فيهم ندي حاجة منه.... رح نكون الفنان........
راهم ناضو فسدولي كل شي كيما العادة... بابا راح يصلي فالمسجد..... زربت رجعت للفراش قبل ما يشوفني ويقولي هيا تصلي معايا.....
رجعت وعلابالي مانيش رح نرجع نرقد.... غمضت عينيا و رجعت نتسخايل كي العادة...

... طلع الصباح وكل واحد راهو فايق،لي نايض باش يفطر ولي مبكر على خدمتو ولي مزال راقد..... الحومة كانت معمرة.. ناس رايحة وناس جاية والقلوب ما يعرف حالها غير ربي سبحانو........ من الدار الكبيرة في آخر الحومة خرج باش يروح لليسي كالعادة.. حاط كاسكيطة كحلة ومداير نواضر تع الشوفة... معاهم كيتمان بموسيقى غريبة وتخوف... تحسها تنويم مغناطيسي... يمشي بخطوات صغيرة.. وبكتاف طايحين شوية ميبانوش مع قشو العريض لي لابسو...... وساهي في نقطة لي قدامو ميشوف في حتا واحد.... ولاد حومتو يعيطولو المعقد..... وساعات بالمريض ولا المهبول.....
جامي سمعلهم وجامي رايح يسمعلهم.... الناس وهدراتها جامي تخلص دايما حكايات وروايات جديدة يألفوها عليك وأنت جامي عرفتها....

.... بصح الناس لأول مرة كانت صادقة في حاجة هو مكانش مهبول ومكانش معقد ويا ريتو كان كيما قالو الناس...... لكن الحقيقة جانب خلاف....... تآدي روحو قبل متآدي الناس
روحو لي هايمة وقاعدة تموت كل يوم...
".... أي علاء اسناني، وين راك سارح.."
"... راني هنا...."
يكذب ماهوش هنا؟ وين معلاباليش؟ هو يقولكم ☠️🖤