كتمان [ مكتملة ]

الحلقة 78

#كتمان

ناض اليوم متوخر وزيد الجمعة ميخدمش.. مس راسو وناض... رقبتو وجعتو من الرقاد هادا... طرشق صوابعو وناض... مشا بالشورط وحفيان حتى للكوزينة... لقاها تدير الفطور وسارحة... محستش بيه غير كي نحالها الكأس من يدها وترشف منو...

طلع عينيه فيها مستغرب... يعني تكون نسات وش هدرو لبارح... مدلها الكأس تشرب منو... تبسمت وتفكرت نهار تقيا كي شربت من كاسو واليوم هو لي قاعد يمدلها ويشرب معاها.. هادي حاجة مليحة تطورت في علاقتهم... أما لي شاغلها هو اسماء هادي... اكم تعرفو المرة اذا حكمها الشك... تقدر دير اي حاجة بش تلقى جواب لأسئلتها... مسحت كرشها وتفكرت بنو مبقالهاش بزاف وتزيد... راهي دخلت فالشهر السابع...

قعد على الكرسي وياكل... شهيتو ولات مفتوحة ملي ولات تسكن معاه... مشاركتها ليه في ابسط حاجاتو خلاتو يتبدل من جوايه بزاف...
"... علابلك بقالي شهرين ونزيد..."
مضغ وش في فمو و هزلها براسو موافق كلامها...
"...علابالي والمطلوب...؟؟".
"...خايفة يجي نهار وكامل يعرفو بنو هادي مش بنتك... ويواجهوها انو هي بنت حرام.. خايفة يجي نهار وتلقى روحها فالزنقة... لا أب لا والو... نتا مش رايح تتحمل مسؤولية غلطتي... "

"... نقعدو نعاودو فالهدرة درك يخي هدرنا فالسيجي هدا... قابلك بكلشي... فتون تعرفيني منحبش نعاود الهدرة.... وديجا ليوم عندك رونديفو البسي قشك وهيا... "
"... نتا دايما هكدا هئ هئ تسكتني.... نتا ملكش لاتي بيا وماش معتبرني مرتك... نتا كذاب... هئ هئ... "
طلع الغاز لراسو وشبيها هادي درك... نعبو الهرمونات هادي...

"... فتون بلعي فمك وقيليني... هياااااا "
".... منروحش وديجا خارجة فهمتتتت.... لا حبي لا كلام حلو لا رومانسية... وشبيك مداير هكدا... تسما طول عمري نقعد شايحة انا... "

حل عينيه وهي شرعت عينيها معاه.... ويا ليتها ما نطقت... وجهو حمار وهي اكتر... هدا وين فهم وش تحوس بحكم هي اونسانت تكون الشهوة تاعها زايدة..... ودرك زادت بينتلو وش تحوس...

يا أرض انشقي وابلعيني... خلاص رايحة تتغاشا وش داها تقول هكدا... درك يقول بنو هدا وش تحوس... راحت الهيبة بيناتهم..... خلاها وخرج وهي لبست قشها ولحقتو...

وصلو للكابيني وعداو على الطبيبة... هو تالمو حشم بزاف منها مقدرش يشوف فيها وهي اكتر.... تحسيه طفل بريء مزال عندو نفس قلب ومشاعر الطفل تع خمس سنين...