كتمان [ مكتملة ]

الحلقة 46

#كتمان
الدنيا تعطيك فرصة وحدة بش تحب وتعيش..... وتكون فرحان اذا استغليتها رح تعيش كيما مخطط اما اذا فضلت الحزن والكئابة رح تكون رفيقك الابدي...
القرب هداك لي كان بينو وبينها غير مألوف ليه... بالنسبة ليه هي قاست حاجة ملكو هو... جسمو ملك ليه.... واحد ما لازم يقرب ليه...

بعد بوسة النسيان هاديك... الصدمة على وجوهم في زوج... هي من جرئتها الغريبة وهو من ملمس يديها على وجهو....

من الخلعة طلعت للطموبيل من لورا.... خافت كشما يديرلها.... وهو تجمد فيه الدم.... وجهو حمار..... وحط يدو على خدو يقيس فيه... حاجة تحرق من الداخل..... النفس قاعد يتقطع عليه.... شاف لقا الناس تتفرج فيهم...... وكاين لي يضحك عليهم.... ولي يستغفر منهم....

ركب قدامها.... ومزال مش مأمن.... مش عارف علاه دارت هكدا.... ولا وش ره يحس درك...
وصلو للدار وطلعو وهو رح لبيتو وقفل الباب.. يدور رايح جاي... ساعة يضرب وجهو... وساعة يشوف مع المراية.... ساعة يتبسم..

كل شي مخربط ومعندوش معنى.... الحجرة لي داخلو بدأت تتفتت.......

فتون راحت تجري وفرحانة... يعني بدا يتقبلها رح تخليه مع الوقت يتقبلها.... ورح تعيش المستقبل لي حابتو....يمكن أحلامها مع الياس كانت خيالية.. أما درك حابة تعيش المستقبل والواقع.....
عدات ليلة طويلة في زوج عليهم... كل وحد مدور ومحضن مخدة.....

♣️♣️♣️♣️
اليوم عرس ايهم ودارين.... قررو اليوم يديروه مع بعضهم..... عدات الربع شهر تجري.... توطدت العلاقات وكامل فرحانين..... ناقصهم علاء اما محبش يجي.... كرامتو فوق الكل... عنيد ولي فراسو هو لي يصرا....

كي العادة العرس كان هايل و تقليدي.... كلشي كان حاضر فيه.... حبيبة تشوف مع ولادها لي كل يوم قاعدين يزوجو ويخليوها.... فرغت عليها الدار.... منلوموهاش تبقى ام أنانية ومدابيها ولادها دايما قدامها....
راحو العرسان كل واحد فطريق لبداية زوجية سعيدة وهانية....

طلعت درصاف لبيتها.... غاضتها روحها... وهي تسمع النسا يقولو عليها بايرة.... ختها الصغيرة تزوجت وهي لا.... افكار تافهة و جاهلة.... شافت مع روحها في المراية.... وش خصها هي... دارين فواه خير منها....

قعدت على السرير.... تسمع فالضحك لفوق عند دار خوها.... باينين زاهيين وفرحانين...

فالصباح ناضت تلم وتسيق.... حاسة روحها غير خدامة.... خاوتها كامل تزوجو وهي راهي 28 سنة قريب تقفلها ومكاين والو
سمعت مها تعيطلها.... راحت تشنف...
".. اني عيطت لختك وراهي تسال عليك... ربي يهنيها نشاله..."
".... نشاله.."
"... وشبيك مشنفة على الصباح وش كاين... ؟؟"
".... مابيا والو.... قلقانة وديجا حابة نخرج تغميت من الدار..."
".... ديري لغدا لزكريا وباباك ومبعد نخرجو انا وياك.... باباك حلف عليك مكانش خروج بلا بيا... "
تاففت وراحت كملت كلشي.... وخرجو هي ومها... السوق معمر والحالة معبية.... حبت تشري قش ومكياج... أما لدراهم مكانش... مها تشري غير حوايج رخاص في السوق.... حابة تروح للحوانت تع الماركة... حابة تعيش كيما الناس لي لباس عليهم... وزادت تلاقات صحبتها في الليسي.... زوجت بولد الوالي وراهي عايشة في الجنة......

كملو الدوران وروحو..... هي طلعت لبيتها فالتليفون... كشما تلقى ميساجات ولا حاجة... رقدت وتخمم ايمن وين راه درك.... اكيد نساها.. بلاك لوكان كملت معاه رح يتزوجها... أما شبع منها وش يدير بيها درك.....