كتمان [ مكتملة ]

الحلقة 14

#كتمان

المسرحية عدات على عينو الكل... ضحك باستهزاء.... الذل بعينو... عجبتو معاناتها ورضات كبرياؤه التافه..... هدا هو الحب لي كان يتمنا يعيشو.... بالناقص منو.... مش حاب يعيش عذاب زايد......
اما هي قعدت قدام الباب تبكي بحرقة كبيرة... لي يعدي يدعيلها ربي ياخذها ويهنيها.... وكاين لي يضحك عليها..... الدموع محبسوش وين تروح درك؟؟ لا دار لا عايلة لا حبيب.... أول مرة تحس باليتم والخذلان.... أقسى حاجة انك تكون يتيم ووالديك لزوج حيين.... عندك دار وتبات في الشارع......
راح عندها وفي بالو بلان هايل.... خلي يستغلها في حاجة تفيدو... حاب يجرب يخلي الشيطان يتلبسو مرة...... عانى من دور البطل المضحي...... و تحول للشرير المستغل
مشي بخطوات ثابتة ليها..... طلعت راسها ليه بزربة..... حسبتو راح... وقفت على رجليها وتشوف معاه
ضحكت بزربة قالتلو.... "اسمحلي مشكرتكش قبيلا.... من فرحتي نسيت.."
طلع حاجب وعينيه مركزة على باب الدار
"..... هادي داركم.. ولا راكي غالطة فيها...؟؟ علاه واقفة لهنا....."
"... هيه دارنا متخافش عليا ام درك يجيو يحلو الباب يكونو برا درك تقدر تروح....."
"..... خلي نسنا معاك ونشوفهم.... "
استغربت منو وخافت يفيق بيها..... مسحت يدها على شعرها وعصرتو ما بين يديه.... كريز جاتها
توله ليها و قاعد يراقب في يديها ووجها حتى تغاشات وطاحت بين رجليه..... فالوقت هاداك خرج الياس من الباب لقا راجل وفتون طايحة بين رجليه.... مقدر يدير والو.... ضميرو أنبو على حالتها..... مشا وخلاها.... أما علاء حفظ البلاصة وسكانا وجه الياس وهو يشوف مع فتون...... فهم بنو حب من طرف واحد هههه

هزها على كتفو كانت خفيفة.. وكمل مشى... الغاشي كامل يشوف معاه.... شكون هذا وكل واحد يختلق حكاية.....
♣️♣️♣️♣️♣️
في بلاصة خلاف في دار سي علاء.... كان بلال خارج ويضحك كي العادة مع ولاد حومتو... يعيطولو الكلون.... تع تمسخير وجامي كان سيريو..... ضحايكي بزاف وعينيه دايما مقفولين من الضحك......
كانت تسنا فيه كي العادة.... خداوج الصوصيالة كيما يعيطولها.... من لي كانت صغيرة وهي مغرمة بيه ولي تقرب منو تكرهلها حياتها.......
خرجت تجري موراه.... وتعيط باسمو من بعيد وهو والف بيها ولات من الروتين تاعو..... ساعات تجيه كيما اختو وساعات يحسها صاحبتو.....
".... أ بلال سنا وين رايح.... وصلني معاك للكوسمتيك..... راني روطار..."
شاف معاها وضحك... جامي تتبدل هادي الطفلة... لابسة جلابة خضرا ومكياج فونسي قوس قزح.... و الشوارب زوج ميترات مع الغوج الحمر.... ويكمل اللوك مع اللطاش لي حاكم شعرها الكحل الطويل.... وطرباقة صفرة تبريي من بعيد.....
تمشي وتميل وحدها وتشوف معاه.... كملو الطريق وهي فرحانة......
".... بلال مكش معول تخطب...."
".... لا ختي مزال ملقيتش لي تعمرلي عيني...."
".... واه قال ختك.... مانيش ختك........... علاه راضعةمعاك انا...و زيد الحومة معمرة بناويت... دور شويا فالدار لي مقابلتكم.... بابها كحل تلقا الطفلة لي تسترك وتحبك...."
ضحك من قلبو... الطفلة هادي مهبولة وبايعة عقلها صح.... علابالو تحبو مي هو ماهوش مقتنع بيها بزاف... مش حاب يجرحها... وصلها للكوسمتيك وهي تحكي على العراس وتمعنيلو كيفاه حابة عرسها.... حكاتلو حتى على دخلة بنت عمها ولي تغاشات فيها..... هادي هي خداوج