كتمان [ مكتملة ]

الحلقة 62

#كتمان

كانت عيادة كبيرة... دخل وكامل يراقبو فيه... كأنو مغناطيس يجذب فيهم... هبط عينيه للرض وراح عند تع الاستقبال
"... بونجور موسيو..."
"... الطبيب لداخل؟؟"
".... وي موسيو اما لازم تسنا لانو مزال كاينين قبلك... عندك موعد معاه..."
"... لا"
بانو ملامح التوتر على المرة... سكتت شوية
"... موسيو اقعد حتى تجي دالتك..."
راح قعد وحس بذاتو تعرق... اول مرة يحس روحو ضعيف كيما هاك... بقا يراقب فلي قدامو... كاين لي جايب ولدو صغير وكاين الي جايبة راجلها ولي جايب مرتو... وكل واحد ومرضو.... حط راسو على الحيط وذاكرتو راحت للهداك العام المنحوس لي بدلو حياتو وخلاه شخص مريض نفسي... يتمنى الموت في كل دقيقة تعدي من حياتو....

".... رايح تتعالج هههه كيفاه رح تواجه الطبيب... ستعرفت بنك مهبول.... اخرج قبل ما تزيد تتورط كتر..."
".... لا انا مريض لازم نخرج وش لداخل.. غلبت من كلشي.... كرهت نشوفها في خيالاتي خايف نرقد وتجيني كابوس.... وليت منقدرش نرقد..."
".... أنت خواف واكبر خواف شفتو في حياتي.. روح موت واتهنى.... شفت عايلتك كاملة حابينك تموت ويتهناو منك.... نفذ امنيتهم.... هيا روح ومترجعش... "

ناض خايف ويرجف والناس يشوفو معاه... ويضحكو عليه كي شافوه يهدر وحدو كي المهبول....

جا خارج... فالوقت هداك كان الطبيب خرج من البيرو... في سع عرفو... حكمو من يدو..
"... علاء هههه والله عرفتك تجي هيا دخل نسبقك عليهم... وشبيك ترجف هكدا... "
جبد يدو بزربة ونطق بهمس خفيف
"... رايح نقتل روحي اششش ههههه يزيد يسمعك ويلحقني درك نتخبا بش ميلقانيش.. ههههه"
اسامة استغرب منو وقعد يشوف ما لقا والو.. حكمو من يدو ويمشي فيه وهو متكمش ويتبسم كي المهبول مع الناس....
دخل وقعد مقابلو... يحاول يقرأ لغة الجسد تاعو... باينة حالتو معقدة بزاف....وحالتو تنهار كل يوم...

حاول يخفي قلقو وركز الشوفة معاه يحاول يعطيه الراحة بش يدير فيه كونفيونس ويحكيلو...
".... هههه علاء شكون لي قال بنك تجي ليوم.. اهيه قولي وشبيك شكون لي مقلقك وجايبك هنايا..."
"... حتى واحد جيت وحدي... متحاولش تلعبها الملاك الطاهر هنايا..."
كمل الطبيب معاه وفي فمو نفس الابتسامة..
".... معليش قولي واحكيلي وش هو المشكل تاعك.."
"..... ماعندي حتى مشكله... ومكنتش حاب ندخل عندك راني خارج... "

".... علاء مانيش حاب نكذب عليك... حالتك النفسية بالنسبة ليا راهي مدهورة بزاف... وتقدر مع الوقت تدخل لسبيطار الأمراض العقلية... و ميكونش في مقدوري نعاونك وقتها... حاول تتعالج وخمم في واحد تحبو.. مك ختك خوك.. واحد يخليك تحب تعيش وتحب الحياة... يخليك تنسى مرضك وكلشي وتعيش في عالم معاه بلا ما يجي خيال اسما لراسك... "

رجع للكرسي وقعد.... اول واحد جا في بالو هي فتون...
"... شكون هي لي تخليك ترقد وانت مرتاح كل يوم... "
".... فتون "
ضحك أسامة وعرف بنو ساعات الأمان والحب هو العلاج الوحيد لصاحبو.....
نظرة علاء تبدلت من البرود والغضب لنظرة متألمة حزينة...سكت وهو يشوف معاه عرفو بنو رايح يحكي ويهدر.....

".... 14 فيفري.... النهار هداك كان مغيم والحالة هادية... يما كانت فالكوزينة تطيب وكنت فرحان بسك رايحة ديرلي المحجوبة لي نحبها ههههه كنت علاء البريء مولا ست سنين.. يحب الرسم والألوان... وكنت نرسم كل شي كان في بالي... خاوتي كانو يقراو وبابا يخدم وختي دارين مزالت صغيرة هي وزاكي لي كان مزال بيبي.... حياة ولا أحلى...
طبطب الباب دقات خفاف.... راحت يما تحل الباب ودخلت ملاك الشر هههه "
حس بيه سكت وغصة في صوتو و كأنو رايح يبكي...
"... علاء حاول تبكي وتخرج وش كاين للداخل شي لي راك تحكي فيه رح يقعد بيناتنا متخافش.... وجامي كانو الدموع ضعف او اهانة للراجل.... ساعات الكتمان يخليك تتألم."

هزلو براسو و مسح وجهو ونحا النواضر من عينيه