كتمان [ مكتملة ]

الحلقة 18

#كتمان
كانت طريق طويلة.. الصمت سيد الموقف... هي مدورة وجها للتاقة وتفكر في الياس وهو ساهي في الطريق... الحل معاها؟؟ وين يديها..... معرفش علاه مخليها معاه..... وش فايدتو منها هي..... طفلة ذليلة مجروحة ونص مختلة.....
عدات ربع سوايع... حبس قدام الباطيمة... شافت وين راهي
".... علاه جبتني هنايا..... ؟؟ رجعني وين كنت عند دارنا..."
".....بش ترجعي خدامة عندو.... فكريني في اسمو..... اه الياس.... هاو حشاهالك ووراهو مزوج.... ولا نتيا العشيقة تاعو...."
"....ششششكون لي قالك.. نحبو وزيد شاف حالتي هكدا عليها... اصلا دايما نتقابدو ونرجعو لبعضانا هههه هديك مرتو برك اما يحبني انا.... "
في عينيها لمعة الدموع..... راهي في مرحلة النكران....دايما تمد أعذار لي يجرحوها..... جامي حقدت على واحد..... وفي بالها بنو كي تغير حالتها رح يرجع يحبها...
هي تهدر وهو يتفكر بنو كان في نفس حالتها.... عندهم روح تايهة..... روح مجروحة وراهي على حافة الموت..... الاختلاف بنو هي قاعدة تنكر .... أما هو تقبلها.....
هبط من الطموبيل..... وهي تبعتو ساكتة... معندهاش وين تروح.... هو الأمل تعها... ههه معلابلهاش بنو هو يحوس على أمل.... هو مدمر اكتر منها....
حل الباب ودخلو...... جهنم باردة....هدا وش كانت تخمم كي دخلت ليها....... قاعدة تشوف فالحيوط.... وقطرات دم منين الباب تع بيتو....
دار فارغة اما معمرة في نفس الوقت..... معمرة بالدموع والحزن... تحلف بنو الحيوط تبكي دم....
حست بقشعريرة مخيفة كانو مش هما برك فالدار كاين جنون عايشين هنايا..... ريحة دم قاوية

نحا سباطو ومشا حفيان.... متولهش ليها خلاها دير وش تحب....اصلا متهموش.... دار الشي هدا بش يحاول يخفف ذنوبو..... لي ثقلت ظهرو.....

شمت ريحة فيها حبت تدوش.... كرهت هادي اللبسة وكرهت ريحة الدوا..... مقدرتش تهدر معاه..... الخوف مزال مسيطر عليها.... تأكدت بنو هدا العبد مختل عقلي......

دخلت للدوش...... لي كان صغير... دوشت فيه ارتاحت شوية.... لقات مراية مكسرة.... ودم يقطر.....قعدت تسمي وتشهد..... وخرجت ملقاتش وش تلبس..... خرجت بالمنشفة....
َتحوس على حاجة تلبسها.... لقاتو فالبيت وقافل الباب.... طبطبت بخفة عليه... مردش عليها... حتى لقاتو تحل وهو كان راقد فلرض.. ومغمض عينيه.....
".... وش تحوسي؟؟"
تخلعت منو ومن صوتو.... صوت حنش
"..... ممممم عنديش وش نلبسسسس"
".... ناض وجبد تريكو من الخزانة..... تريكوات كامل حمر...... وعطاهولها.... هي حشمت منو اما هولا حياة لمن تنادي.... مشافش اصلا معاها مش منتبه ليها......
خرجت بزربة وبدلت فالدوش..... وراحت قعدت فالصالون..... لي كان فارغ ما فيه والو.... تساءلت واش يخدم..؟ صغير وعندو دار... وعلاه معايش معى والديه......
أسئلة معرفتلهاش أجوبة..... هو الوحيد لي يقدر يفك هدا اللغز...