كتمان [ مكتملة ]

الحلقة 74

#كتمان

فاقت مع روحها وش كانت تدير بعدت عنو بالشوية وحشمت منو...
"... رايحة تسجلي درك.... ؟؟ حتى تسلكي على خير ونخممو وينا جامعة رايحة تقراي..."
".. علاء...."

ولا يعرف انو من وراء هادي علاء حكاية كبيرة جاية... شاف معاها مركز مع وش رايحة تقول
"... شكون هي اسماء لي كل يوم تقول اسمها كي تكون راقد... ؟؟؟"

حست برجفتو بين يديها... جا رح ينوض حكمتو وحاولت تهديه... هي حاسة بنو هادي اسما حاجة كبيرة في حياتو... وشكوكها كترو.. وخمت انها تكون عشيقة قديمة.... ونظن راكم تعرفو الباقي... وهو كراجل جامي شافت الشهوة في عينيه... مهما تكون لابسة ولا عريانة جامي شاف فيها هاديك الشوفة تع المتزوجين ولا اي راجل لمرتو....

يعني يا يكون عندو بلاصة خلاف يخرج فيها الكبت تاعو... يا يكون بارد جنسي.... ولا الأسوء مينجذبش للنسا.... وهادي حاجة مقلقتها بزاف....

"....يخي تفاهمنا انو مدام راح نعيشو مع بعض رح نحكو كلشي... والأسرار لي بيناتنا تزول... قلي مشكلتك علاء... وش هو لي مخبيه عليا.. وعلابالي بنو درصاف تاني علابلها..."

تجمد في بلاصتو... وحاسس بالخوف والرعب
كيفاه رح يقولها بنو هو عاش طفولة كيما هاديك... و رح يقولها بنو هو بيدوفيل.. رايحة تخاف على روحها... شكون هادي لي تقبل حقيقة راجل بارد ميقدرش يمدلها حقوقها الزوجية لانو يعاف العلاقات من صغرو... حاجة صعيبة بزاف...

طلع عينيه فيها وسكت... مش حاب يخرب النظرة هادي لي قاعدة تشوفها في وجهو.. على الأقل درك... حاب يعيش الحب ولو مرة في حياتو حاب يضحك ويفرح على الأقل هادي الفترة لي ضامن بنو هو حي ومش راح يموت....

".... فتون.... يجي نهار وين نكون انا مكانش في هاد الدنيا... وهداك النهار كلشي رح تعرفيه ونتمنى منشوفش نظرة الشفقة و الاشمئزاز في عينيك...."

مع انو الفضول والشك كلاولها قلبها اما تبسمت و اومأت براسها...

كملو هاذيك الليلة مع بعض.. وهي رقدت في بيتو لانو درك مش مليح ترقد فوق البونك.. وهو عقب الليل كامل يرسم.... وهادي المرة تخلى على الدم كيما وصاه الطبيب.. كانت رسمات بألوان عادية....

مشا حفيان للطاقة وقعد يتفرج والبرد يقيس فيه... وين كان ووين ولا.؟؟ حياتو تبدلت 180 درجة.. لقا روحو بين ليلة ونهار متزوج ورح تخلق عندو طفلة.... هههه لدرك ماهوش مأمن... هادا الكل قدر؟؟؟...... كلو صدفة؟؟؟؟ ولا كاين حاجة مورا هاد الكل رح تصرا...