كتمان [ مكتملة ]

الحلقة 76

#كتمان

يعرف كلشي عليها... معداش ساعتين عرف هادا كامل.. صراحة خافت منو شوية...

"... عصام قاعد تعس فيا؟؟ وش معناها الهدرة هادي... وي راح يبيع الحانوت وانا معنديش الدراهم بش نشريه... بردت درك هاك عرفت كلشي..."

جبد ورقة من جيبو وحطها قدامها.... هزتها وقراتها لقاتو شرالها الحانوت وكتبو على اسمها
.. يعني انو الكوسمتيك ولا ملك ليها... هو سناها تقولو مرسي وتتبسم على الأقل... حب غير ضحكة منها ليه... عمرها تبسمت ليه ولا شاركتو حاجة منها...
طلعت عينيها فيه حمر وشواربها يرجفو..
"... علاه درت هكدا ؟؟؟ وش حاب... حاسبني نطلب ونتا تجي تصدق عليا... في بالك رايحة نقبل بالشفقة تاعك.... مزال مجاش لي يصدق عليا ولا يمدلي.."

صدمتو بهدرتها.. تسما فسرت كلشي على انو صدقة وشفقة... حبو ليها مقدرتش تشوفو..

ناض من بلاصتو...
"... خديجة... كيفاه تقولي هكدا... رايحين نتزوجو.. مدام راني راجلك نصرف عليك واي حاجة تحتاجيها هي عليا... أنا مانيش شافق عليك... حسبيها كادو عرسنا... "

"... منقبل والو من عندددددك فهمممممت.. منسحق والو من عندك لا نتا لا عايلتك.. نكرهكم كامل.... هئ هئ.."

حمارو عينيه وحاس بحاجة قاستو من الداخل
الغش عمالو عيونو... ونطق بلا ما يفيق..
"... مانيش بلال اللي معيشك فالمزيرية و لي معندو والو...مقدرش يوفرلك وش نتي حابة..
هو ميستاهلش تقعدي حازنة على جالو.. هو مات وشبع موت... مكانش يحبك... أنا لي كنت نستناك في كل دقيقة تعدي... هدا الشي كامل درتو غير على جالك.. فهمتتتتتي..."

حست بجرح قاعد يحرق فيها من الداخل.. بلال خط أحمر عندها...

وقفت وقابلتو... ومسحت الدموع من عينيها
"... تعرف حاجة.. بلال صح مات اما دا معاه قلب خديجة وروح خديجة ومشاعر خديجة ونتا رح يبقالك غير هاد الجثة... نتا مش رح تكون جزء مني كيما هو... طول عمري مسمية روحي على بلال... وجامي رح يجي نهار لي نتقبل فيه انو انت راجلي.... لانو في كل دقيقة رح نشوفك بلال وبس... "

"... حط يدو على جيهة قلبها لي يخبط... وتبسم بثقة..
"... قابل بالجثة تعك... لمهم انو انا لي رايح يشارك معاك حياتك لي بقات... أنا لي رايح نشاركك في فراشك... ورايح نشارك الجسم تعك معاك.... هههه ويجي نهار رايحة تحبيني كيما نحبك... ونعيشو بلا بلال ومشاكلو..."