كتمان [ مكتملة ]

الحلقة 19

#كتمان

في دار العايلة.... الكل ساكت ويشوف مع بعضاه... مزالو تحت تأثير الصدمة... حبيبة تغاشات وطلعتلها لاطونسيون..... معتز حاشم ماللغري هدا كان في الماضي اما هيبتو قدام عايلتو تهدت وحتى مرتو...... و الطامة الكبيرة هي دورصاف.... شكون كان يقول بنو الطفلة الرزينة والكبيرة تع لافامي دير هكدا.....فضيحة طيحت بيهم كامل..... كي تفقدو التليفون.... شافو تصاورها المبعوتة... هدرتها معاه..... كي شغل راجلها...
كامل كانو راقدين على وذنيهم.... كانو يقولو بنو هي كبيرة مدير والو 27 سنة..... مش تع الشي هدا اما هي كانت لفعة....لمهم شبعت ضرب وسبان من عندهم..... كانت مرمية كي الكلبة وقافلين عليها..... في رايكم كانت ندمانة... هههه لا مكانتش ندمانة.... اصلا هي متحبش ايمن... كان غير لمصلحتها..... حبت تزوج بيه برك... بش تنحي صفة بايرة وعازبة عليها......
وزيد مكانش خطاب..... واحد ما خطبها... ومع الضغط تع مها حبت تدير اي حاجة بش تزوج... منقولش بنو هي ضحية اما شخصيتها ضعيفة وتتأثر.... وبزاف بنات حاطين انو الزواج هو المستقبل....... كل ما تشوف وحدة تزوجت... ولا تخطبت تغيضها روحها وتحسدها.... كل ما تشوف طفل مع امو تحسدها..... تشوف مرت خوتها في زوج قل عليها.... أما هي وحد ما يحبها..... علاه بسك أنانية......ما لامتش علاء.... طول عمرها تتهرب منو ومبعدة عليه.... ضميرها يتعذب بسبتو... يا ريتها مخلاتوش.... يا ريتها نطقت وفضحت كل شي..... أما هي فضلت........ "... الكتمان..."

♣️♣️♣️♣️
برا كان بلال قاعد ويخمم فلي صرا اليوم.... طول عمرو حساس...... غافل على نظرات الهيام في عينين خديجة لي تطل من طاقتها بشوية.....
رفضت ولد عمها.... والخطاب كامل على جالتو.. تسنا فيه يجي يخطبها..... وتتجمع هي وياه.....
دخلت لقات مها قاعدة فوق الكرسي...
"..... اي شكون نتيا... علاه دخلتي لداري وينو احمد علاه طول؟؟؟"
تبسمت بحزن ليها..... كي شغل هاديك خديجة العاشقة راحت وجات في بلاصتها خديجة الحساسة الضعيفة...
عايشة هي ومها المريضة بالزهايمر... باباها طلق مها وخلاها مولات 19سنة وحدها تقاسي مع ام نسات بنتها.... كل ما تسقسيها هي شكون تحس قلبها يتقسم... حبست القرايا وولات تخدم بش تصرف عليهم... دايما يحبو يعاونوهم اما كرامتها متسمحلهاش....
تفكر في ولد عمها عصام لي خطبها.... هي متحملوش وتكرهو... ولوكان يقولها بلال اسنايني تسناه طول العمر..... أما مولاتش تقدر تصبر علا هم الدنيا وحدها.... وزيد النسا ولاو يهدرو عليها....
تنهدت وراحت ترقد مها وهي تسقسي فيها على باباها.... وهي تسكت وتجاوبها بنو جاي كي العادة...