كتمان [ مكتملة ]

الحلقة 44

ليام تجري... منقولكمش الاوضاع مليحة اما الحمدلله... فتون ارتاحت اكتر ولات تطيب وتنضف الدار ساعات..... تقعد قاعدة لا شغل لا والو.... وهو خدام من الصباح لليل يجي طول يرقد..... لا كلام ولا مشاعر.... جبل جليدي بيناتهم..... أما بخصوص حملها فكلشي يمشي عادي.... دخلت درك فالشهر التاني.... فرحتها كي تشوف كرشها كبارت شوية.... اخيرا ولا عندها امل بش تعيش.....

اما هو العكس حياتو ولات أقسى... ولا ميقدرش يتحكم في روحو.... لازم يقتل الطفل قبل ما يجي....مش حاب نسخة من علاء تجي للدنيا..... هو مصيرو واضح... خلي الطفل يروح للجنة بلا عذاب...

تقلبات علاء حاجة مش طبيعية.... هو عندو شخصية مزاجية مع اضطرابات نفسية خلات عندو خيالات وتصرفات غريبة..... هو يبين للناس بنو عبد لباس بيه اما داخلو بحر هايج...كل موجة تخليه يتهور.....

جا فليل.... كانت راقدة.... تبسم تبسيمة غريبة.
ميجي موراها غير حاجة مجنونة....
جبد قرعة صغيرة وجاب زوج كيسان وحطهم فوق الطابلة تع الصالون وداهم.... قعد يسنا حتى تلحق التناش تع الليل... ومبعد قدم ليها... عينيه غماق لونهم.... دليل على تغيير شخصيتو.... قرب ليها وهمس فودنها باسمها...

".... فتون..... فتون... فتون نوضي..."
محستش بيه غير كي عيط باسمها..... قلبها قريب يحبس.... شافت معاه لقاتو يضحك وفرحان..... وشافت الزوج كيسان.

تأملها ببراءة ونوضها من الفراش.... ماهيش فاهمة وش راهو يصرا.... هدا مش علاء لي تعرفو هي.....

قابلها فالكرسي.... وضحك بشوية كي لولاد صغار ومبعد ولا يعض فصوابعو....
"... علاء وشششبيك.... ؟؟ راك تخوف فيا..."

".... متخافيش رح نلعبو لعبة صغيرة برك...."
".... راهو الليل راح الحال درك...."
".... لالا انا نحب نلعب درك.... لازم تلعبي معايا ولا نتغشش منك... هههه"

".... مانيش حابة نلعب.... والله غلبانة..."
عيط عليها وجبدها من يدها....
".... هههه تلعبي بسيف عليك ولا تموتي ههه"

".....خلاص وش هيييي الللللعبة "

"..... كاين زوج كيسان.... واحد فيهم فيه سم... لي يشرب الكأس الغالط يموت... ههه مليحة اللعبة.... "
الخوف تسلل ليها.... حاسة بالرعب منو... اول مرة تحس بنو عبد يخوف.... تبسمت معاه بشوية مرتعبة....

".... علاء ههه حبس تمسخير.... نلعبو لعبة خلاف خير.... والله خوفتني "
هزلها براسو بلا لا وزاد قدم الكبسان.... جات نايضة بش تخرج.... حكمها من يدها وجرها قدامو.....
"... لازم تشربي بب... هههه"
نضت تبكي... حابة تهرب منو.. هدا ماشي علاء.. هادا شيطان لابسو....
".... قتلك خيري واشربي متهبلينيش... متخلينيش نخيرلك انا.... "

هزت بيديها ترجف كأس..... وتشوف معاه... وشواربها جمدو تسنا فيه يحبس الهبال هادا اما هو مكمل معاها وفرحان.... الموت عندو لعبة...... ميخافش منها.... ويحب يلعب بأعصاب الناس ويخوفهم.....
شربت شوية من الكأس..... كان مداقو عادي كي الما....
ولات تنهج وخايفة يكون سم..... حمار وجها ومن الرعبة تغاشات.....

شاف معاها وضحك حتى بانو اسنانو.... قلتلكم مهبول جا يتمسخر معاها قريب قتلها....

مفهمش علاه خافت منو... راح للكتاب لي لقا فيه بنو لازم بين المتزوجين يكون حس الدعابة والمزاح.... ناض طيش الكتاب في الزبل وراح يرقد
لي خدمو الكتاب هادا ميفهمو والو... هادا وش قال في نفسو....