كتمان [ مكتملة ]

الحلقة 22

#كتمان

خرج ومعالم وجهو غير مفهمومة......بين نظرات الموظفين ليه.... حاسبين بنو تطرد من خدمتو..... هو اصلا ميهموش..... مشا ورجع لبيروه ويطرطق في صوابعو.... .....
كمل خدمتو.... لحق وقت الغدا.... الكل خرج وكاين لي يتغذى برا انا هو.... مياكلش... دايما صايم من فنجان القهوة حتا لليل....
اما فتون ناضت من الفراش وحاسة بألم تحت كرشها.... هبطو دموعها..، كرشها تتقطع من الجوع والوجاع.... عيطت باسمو لقاتو مكانش... خرجت تمشي بشوية وتحوس عليه... راحت تحوس على حاجة تأكلها ولا دوا.. ملقاتش حتى فريجدارو فارغ..... كاينة غير قهوة برك.....
قعدت تدعي في ربي يعينها..... محملتش الوضع.... الهمس ولا عياط..... حتى ما حست بشي.... وطاحت فلرض.... مخلية دم تحتها...

كمل سوايع خدمتو بطلوع الروح.... وكمل يمشي حتا للدار.... مع كيتمان ونواظر..... عينيه متوجهين لي قدامو..... عندو كاريزما تخليك تشوفي معاه....
وصل قدام الباطيمة لقا راجل ومرتو وزوج ولادو.... وحدة منهم الطفلة لي جاتو اول مرة... مناقسش مشاكل فوق كاهلو كتر....
عدا عليهم بزربة كي شغل مكانش.... وهما طولو فيه الشوفة، عرفوه الجار الجديد المعقد..... الكل يحكي عليه وشافوه جايب بنت معاه......
".... شفتو.. ماما هدا هو لي خبط عليا الباب هديك المرة..."
"... شوف يا راجل كيفاه مداير ليكون يزطل ولا يشرب.... سترها ربي... لوكان حكمها كشما دار فيها..."
".... اسكتي علينا... زعما سقسيت عليه.. واحد ما يعرفو من الجيران.... يروح الصباح ويجي العشية..... والله غريب... "
".... قالتلي الجارة جاب معاه طفلة..... حفيانة وباينة مضروبة.... "
"... كشما نحكم عليه نشكيو بيه.... خصنا غير المهابل يسكنو معانا.... "

الواقع المر لي عايشين فيه.... ناس تهتم وتعس في ناس خرى..... ميعرفوش ظروف الناس ولا وش هازين في قلوبهم... ويحكمو بنو هادي عاهرة... هادا معقد.... هادي خاينة......
وينساو بنو راهم عباد يحسو وعندهم مشاعر....
وصل حل الباب وكان الوضع هادي.... صوت الحشرة يتسمع.... غمض عينيه شم ريحة دم خانزة..... مشا بخطوات ثابتة حتى لقاها طايحة وبركة دم تحتها....

شاف معاها بنظرات لا مبالاة.... زعما يخليها تموت.... بلاك يرتحها من ذنبها.... كل وضع يطيحو فيه لازم يخير بين شيطانو وضميرو، الصراع قاوي بيناتهم.....تنهد وزرب هزها وخرج يجري من الدار..... حطها فالطموبيل... ومشا يسوق ساعة يزرب بش يمنعها وساعة يبطأ بش يقرب عزرائيل منها..... اختلال عقلي واضح.....

هزها وعايف روحو..... ميحملش تلامس مع ناس.... دخل لقا شوية غاشي.... راح لعند فرملي لقاه لتما.... شافو بنو حالتها خطيرة دخلوها للاستعجالات.....
قعد فوق الكرسي ولا علابله مش مهتم... تموت ولا لالا.... الموت ارحم ليها من ذلها وخضوعها لقلبها......