كتمان [ مكتملة ]

الحلقة 50

#كتمان

يوم جديد واحداث جديدة.... كل واحد و شغالو...
حبيبة تفاهمت تجي عايلة ياسين هدا بش يحكيو ويتعارفو.... و متمنية من كل قلبها يصدق كلشي ويكون مكتوب بنتها...

درصاف شافت مها تعدل وتفرز على غير العادة
جاتها بيزار، لمو ومها تندب بش تعدل حالتها وهي تمكر وتسمط فيها... متحبش عبد يامرها ولا يملي عليها وش دير...

كي خلصو... قعدت تكونكتي شوية... حتى لقات ميساج من عند ايمن.... سنات ربع ساعة
موراها بعتت حمدلله هاديك...
فلول محبتش تحكي معاه... لكن شوية شوية ولاو يحكيو ويتشايخو....وفهاد المرة مخططة تلصق فيه.... هو لباس عليه وعلابلها باباه عندو مصنع.... خلي تستفاد منو... الأمل الوحيد بش تخرج من دار الجزار...

لتحت دخلو خنساء وبنتها وسارة كنتها.... وحبيبة ترحب وتعاود بيهم.... دخلتهم و باقية تسكاني في حالتهم وش جابو معاهم...

".... ختي حبيبة صراحة سقسينا عليكم وكامل يشكرو في عايلتكم... الله يبارك.. ومدابيا نشوف درصاف... نشاله يصدق مكتوب بيناتنا..."
"... نشاله ختي.. وانا تاني مدابيا اما الشوار للولاد...."
".... أنا الحق ياسين مش حاب الزواج من اصلو... عييت معاه كل مرة يرفض... عييت نعرف وش حاب.... هو الصغير عندي... 33سنة ومهداهش ربي... "

".... ربي يعيشهولك.... أنا بنتي درصاف مناقصها والو.... كلشي كامل عندها والكامل ربي... لكن مكانش خطاب يعجبو ويعمرو العين.... وهي شبعانة و حابة غير الهنا... "

".... عيطيلها نحكيو معاها ونتعرفو عليها.."

".... درك نجي كولو بصحتكم.. "

هي سمعت خطوات مها وهي خبات التليفون بزربة..
"... وين كنتي نتيا؟؟؟ اسمعي روحي البسي روبة مليحة واهبطي... وديري حاجة ولا تنطقي بكلمة خاطية نقول لباباك يتفاهم معاك.... و علابلك وش يدير كي يسمع بخدايمك... "

زربت لبست وراحت عندهم... ندبة شكون هادو درك
راحت تسلم عليهم بالتشناف وباقية طلع وتهبط فيهم باينين قد حالهم... زهرها غير مع الزواولة...

".... درصاف بنتي وش راكي؟؟ "
"..... حمدلله خالتي ونتي حوالك صفا "
".... نقولو الحمد لله "
".... بنتك شابة حبيبة الله يبارك...."
ضحكت حبيبة وتخنزر في درصاف قدامها
".... يعيشك حنونة...."

شحال تكره التمسخير هادا، حابة غير تنوض وتخلص الدراما هادي
"... نشاله السمانة الجاية نجيو ويكون كل شي رسمي والأولاد بتعرفو.... "
روحو وهي بقات تعيط وحدها... هدا وش بقى تزوج من عايلة كيما هادي
".... اسمعي نتيا هدا الزواج لي رح يصرا... لكان والفتي التسركيل والتزعبين تنسايه معايا..."
"... شوفي يا لالة حبيبة انا مانيش متزوجة... درصاف بنت الجزار تزوج بهادوك... شفتي العباية هاديك والخمار المطاشي....حتى حاجة غالية مجابو هاش...."
"...متهبلينيش هديك العايلة لي رايحة تزوجي بيها.... الهدرة هادي رايحة تندمي عليها... خافي ربي.... كوني قانعة واحترمي الناس حرام عليك تضحكي عليهم... "
"... أما مانيش وجه ميزيرية كيما نتيا... "
هدرتلها زوج كلمات وخلاتها تعاود في هدرتها.. قاستها... بنتها لي جابتها وتعبت عليها تقولها هكد ....
دعات عليها دعوة رح تخلي درصاف تبكي الدم
.... دعوة الوالدين أقسى من اي رصاصة.. 🖤🖤🖤