كتمان [ مكتملة ]

الحلقة 2

"...... اسمع سلفلي خمسين  مسحقها اليوم هيا ازرب.."
شاف معاه بشوفتو الباردة ومدهالو ومشا بعد ما رجع الكيتمان لوذنو.... ،الطريق تع الليسي كانت طويلة... وصل ودخل للساحة وقعد في بلاصة منعزلة شوية بش واحد ميقلقو... ومزال سارح لي يشوفو يقول بنو هادا هاز هموم الدنيا الكل على ظهرو... بسك في العمر تع المراهقة نكونو عكس هكدا صح المشاعر مخربطة ومنفهوش رواحنا لكن التمرد والهبال والضحك رح تكون في هاد الفترة... لكن هو كان مختلف عن العادة.... كل حاجة عندها شواذ وهو كان من الشواذ هاذي.....
فرغت الساحة وطلعو كامل.... طلع هو الأخر كي العادة ودخل... وقعد في الشوكة الطابلة الرابعة، يسنا الوقت لي يخرج فيه منا ويرجع للدار، خلص النهار وخرج من الليسي ويتفرج فالناس لي يرندف مع صحبتو ولي ركبت في الطموبيل تع حبيبها.... اكم تعرفو الليسي واجوائه
وصل للدار والبرود على وجهو تحلف انو عبد ميت... وجه شاحب و سواد تحت عيونو وشعرو لي مكانش..... لبسو لعريض الحمر... تحسو خارج من فيلم رعب... عينيه كل وحدة ولون من عند ربي عندو عين بنية و عين خضرا،.....
طبطب على الباب بدقات خفاف..... ميتسمعوش... فتحتلو ختو الباب وعينها في التليفون، دخل وراح لبيتو بزربة محاب يهدر مع حتا واحد..... حط كرطابلو وقعد يرسم في رسمة جديدة... من لي كان صغير يحب يرسم، حاجة برك لي تبدلت فيه هي الهدف من رسمتو كان يرسم لانو يحب لكن درك قاعد يرسم بس يعيش ويبعد على جرح الماضي اللي جامي نساه وجامي راح ينساه....

.....هادا هو الشرير والبطل تع الكرونيك .. علابالي راكم تقولو كيفاه بطل وشرير في نفس الوقت... كل شي يبان واكبر عدو للانسان هي نفسه وشيطان في الاخير....
علاء.... فنان الألم تاعي.....شخصية باردة بمعنى الكلمة.... 18 سنة... واحد ما يعرف كيفاه يخمم َفواه يسرح.... عايش في عالم خيالي.... معقد من أبسط الأمور.... ابتسامته معجزة ثامنة... لانو المشاعر عنده تلاشت... علاه ....مش عارف
.... عايش في حومة شعبية عادية في دار كبيرة بحكم هما في7 خاوة... صغار وكبار... دار الجزار كيما يعيطولها.. بحكم باباه عندو مجزرة في آخر الحومة.... راجل بكلمتو وشانو
عمي موسى.... هو الكل فالكل جا وهو مرتو من بلاصة بعيدة وسكنو.. كانو عايشين بالما مي بربي ورحمتو قدرو يطورو رواحهم حتا حلو حانوت للجزارة... وشراو دار كبيرة ليهم...
سي موسى و حبيبة عندهم 7 ولاد... 2بنات و 5دكورة ومن ولادهم بطل تعنا علاء.....
.... وقت العشا جا ولازم يتجمعو.... قوانين العايلة... الكل قعد وياكل والهرج لازم يكون وهو يخمم وكتاه ينوض يكره هاد التجمعات... ويكره الهدرة بزاف...
كان الكل متلوه مع روحو،.. غير امو لي تشوف معاه... حاسة بولدها ماهوش مليح ولدها قاعد يتعذب وواحد ما حاس بيه.... صح طول عمرو سكوتي وهادي بصح توحشتو توحشت ضحكتو الي مشافتهاش عندها سنين وسنين...
"... علاء ولدي كول علاه قاعد تشوف في الصحن... شوف كيفاه ضعفت...."
"... خليه يما.. اكي تعرفيه ماهوش غريب..."
"..... والله تقول خارج من الحبس.. مفهمتش علاه يضال ينحي في شعرو... خليه يطوال شوية...."
"هههه شفته كيفاه برا تقول فامبير والله يشبهلهم مع هو مصفار... "
ناض الكل يضحك وامو تبسمت اما هو حجرة ما تبسم ولا هدر، رجع لبيتو كي العادة..."
"... علاه هدرت مع خوك هكداك.. هاو زعف وناض"
"... يما ربي يهديك.. هادا هو علاء مش حاجة جديدة ولدك وتعرفيه"
".. خلاص اسكتو علينا..."