#كتمان
تكات على السرير مقابلة البلافون وشعرها مسرح بطولو.... شافها هكداك رقد جنبها وهو تاني نفس الشي.... في زوج قاعدين يتعذبو بجرح الحب.... جرح الخيانة... جرح المشاعر..
صعيب انك علابلك مرتك لي هي حقك قاعدة تخمم في واحد خلاف ومش قادر تدير اي حاجة..... رجولته وكرامته تتهان معاها... أما حبو وعشقو الولهان خلاه ينسا كلشي ويقعد يشوف معاها بكل عشق وحب.. يمكن يحن قلبها عليه شي نهار...
"......مش رايح تدي حقك هاني قدامك.. قابلة
ومش رح نقاومك... دير وش تحب... ؟؟ الشي لي تزوجتني عليه هاو بين يديك..."
دور على جنبو وباقي سارح مغمض عينيه يشم في ريحتها....
"..... خديجة علابلك بنو انت أجمل حاجة في حياتي...."
دورت ليه ودرك تقابلو وجه لوجه...
"... ههه منقدرش نكذب عليك ونقولهالك.. اسمحلي... "
".... هههه معليش نعرفك صريحة بزاف... خداوج الصوصيالة... ههه مفهمتش كيفاه خليتيهم يقولوهالك.... كنتي لي يهدرلك حاجة ولا يعايرك تقتليه بالضرب... "
تمحات ابتسامتو بابتسامة حزن ظاهر..
".... اه عرفت هههه بسك بلال لي سماهالك.. وكل شي من عند بلال هو حاجة مقدسة ليك.."
".....ههه ظهرت عارف كلشي عليا....."
"....حافظ كلشي عليك... مزلتي انت هي انت.. ومزال حبي ليك هو هو.... "
شافها سكتت وغمضت عينيها... غمض عينيه هو تاني ورقدو كل واحد بعيد على الآخر...
بعد اسبوع.. لي تغيرو فيه حوايج بزاف... هبط علاء من الطموبيل بش يقابل عايلتو.... وهاد المرة... حاب يتصالح معاهم... صح خطوة صعيبة وجريئة ليه... أما حاب يرجع عند فتون وهو سعيد ومرتاح... خلي الماضي للماضي وعيش الحاضر...
طبطب على الباب بشوية كي عادتو... حلتلو مو الباب... دوبها ترمات عليه تحضن وتبوس كي عادتها الحنينة... قعد معاها وتحكيلو وش صرا... وهو كلمة يفهم كلمة لا.... نسا وحكاياتهم جامي يخلاصو.... زاد جا خوه والعائلة كامل تلمو... صراحة هما متفاجئين من جيتو هادي...
تلمو ياكلو ويضحكو.... صح لمة ناقصة بلا خوه لي توحشو بزاف... أما الحياة تستمر...
"... علاه جيت ليوم غير الخير؟؟؟ ماكش مالف..."
نطقت مها مشنفة عليها
".... درصاف لوكان تبلعي فمك وتاكلي مش خير... خوك جا توحشنا ونتي باقية تشركي على فمك... سكتينا وخلصينا من مشاكلك.."
".... صراحة حاب تحكي حاجة... بلع ريقو بصعوبة.. أنا....خليو سع نقعدو فالصالون خير... "
شافو في بعض باستغراب ولمو لماعن... وهو حكم يد درصاف ودخل للبيت...
"... درصاف بعدي على أيمن... الراجل هداك مزوج و عندو زوج ولاد... ماهوش ليك.. وراني ننصح فيك واعتبري كلشي بيناتنا هدنة.. ولا نهاية حرب....."
ضحكات ضحكة طويلة عريضة.....
"... هههههه من نيتك علاء... راك مليح ولا رايحة تطلعلك السخانة... من وكتاش نتا تدخل في حياتي ههه انا لكبيرة ونعرف صلاحي.. يكون حتى عندو عشرة... قابلة بيه...نحبو الله غالب... "
"... بركاي ما تكذبي ... نتي متحبيهش.. في زوج علابنا وش ديري على جال الدراهم ملا غير بعدي عليه... احسن ليك.... "
"... مانيش مبعدة عليه وش تحب...امشي شوف مرتك يا نص الراجل ومبعد اهدر معايا ههه آخر زمن... "
خرجت وخلاتو... وهو معرفش وش يدير.. حاب يحميها وفي نفس الوقت يخليها تحس شوية....
خرج تابعها يتنهد... لازم يفري لحكاية ليوم يمكن حالتو النفسية تتحسن وهي خليها بينها وبين مولاها... يجي نهار رح تفيق...
"... حبيت نلمكم ليوم بش نهدرو في حاجة... حاب نطلب السماح من كل واحد مقابلني اليوم..
يما سمحيلي... غلطت معاك بزاف علابالي كنت دايما نجرحك... كنت خايف نتعود على حنانتك وكي نخسرها نتعذب ونهبل... كرهت من الوحدة والله حاب نحس بعايلتي ولو مرة في حياتي... بابا ههه سي موسى الهيبة تع الدار علابلك كنت نخافك دايما ونقول لازم نولي كيفك... أما فشلت ههه سمحلي على اي حاجة خرجت مني.... خاوتي معتز وزاكي وأيهم... سمحولي لاني مكنتش الأخ لي تتمناوه... كنت نخاف نقيسكم كاش نهار ولا نحطم أمالكم بيا... دارين سمحيلي ختي....... صغيرونة تاعي لي كانت تجري مورايا فالليسي بش نحكي معاها.... كل واحد فيكم غالي عليا ومن بعد موت بلال عرفت يمكن نقدر نخسركم ولا تخسروني... وهذا خلاني نجي اليوم... بش نقولكم كل لي في قلبي... سمحولي "
تنفس بشوية ورتاح... حس بهم كبير انزاح عليه اليوم... بقا يشوف معاهم وهما قاعدين
هبطو دموع من عينيهم الكل... متأثرين بواش قال... جامي كانو حاسبين بنو الكلام هادا كان مخبيه... علاء الكتوم نطق وش في قلبو.. مسح راسو بيديه..
"... سمحولي كامل.. ومدابيا يجي نهار تعاودو تعتابروني فرد من عايلة الجزار اما بشخصية جديدة... طلع راسو للسما ونطق بهمس..
"... بلال خويا اسمحلي و َاذا راك تسمع فيا درك نتمنا نتلاقاك كاش نهار... توحشتك... "
ناضو ليه يحضنوه... كل واحد يبكي حتى الرجال... حسو بالنقص تع بلال تملا بعلاء لي كان بعيد عليهم... الشخص الوحيد لي كان مش عاجبو هادا هو درصاف.... درك برجعتو للدار راح يخرب بلاناتها... اصلا علاه يسامحوه
... طول عمرهم يتلهاو بيه وهو غايب وفي حضورو كامل يشوفو معاه.... و هي النكرة الشريرة فالحكاية.... نكرهك علاء... همست بصوت خفيف..
أنت تقرأ
كتمان [ مكتملة ]
Short Storyأول قصة ليا وكنت مبتدئة فيها شوية... لكن كتبتها بشغف ...بقلمي أسيل "كتمان....عندما يصبح البوح محرما .." قصة "كِتْمَانْ" قصة رايحة تخرج من كل واحدة فيكم المكبوت، مع شخصية عايشة في عالم صنعتو لروحها، برا تلقاوها كأي شخص عادي، تتصنع السعادة والف...
![كتمان [ مكتملة ]](https://img.wattpad.com/cover/354613214-64-k629921.jpg)