#كتمان
خطبة خفيفة اما كانت ثقيلة على قلبها.. تشوف فابتسامة باباها وعمها لي فرحانين ليهم... ومرت عمها وبنتها لي باينة مشنفة ومش عاجبها العجب.... ملول مكانتش قابلة..
الشخص الوحيد لي كان صادق هو عصام... هو الوحيد لي فرحان من قلبو... جهز كلشي حتى جهازها لول لي حرقتو.... عاود شرالها من ذوقو.... كأنو حلمو تحقق واخيرا... تبسم ليها وباسها من راسها بوسة خفيفة... معلابالوش بنو راهو في بلاصة عبد خلاف... انو خدا حاجة بلال......همست بصوت خفيف..
".... نحبك بلال"
💕💕💕
"... علاء متهبلنيش اني رايحة نموت ازرب.. هيا هئ هئ "
الوحدة تع الليل والطريق فارغة... لابس شورت وتريكو بالمقلوب خايف كتر منها... ويديه يرجفو كل ساعة يميل بالطموبيل.. رايح جاي وهي عاضة على يدها وعلى الكرسي بش متعيطش.... تشوف في الموت قدام عينيها..
بسيف بش وصلو للسبيطار.... هبط يجري حفيان و خايف.... مقدرش يهزها وهي تبكي
"... شت شكون لي هزني درك... كي كنت نقولك كول وهز صحتك هئ هئ قاعد كي العود اعزرين.... هئ.."
راح جابلها الكرسي وهي تعيط... شعرة ورح يضربها من الحس فوذنيه....
دخلوها طول للبلوك... وهي تبكي... قعد ينهج وعينيه حومرين... حالتو مهدودة... قلبو كل نبضة تزيد وتزيد.... اول مرة يحس بنو خايف على عبد.... تفكر التلت شهور لي كانو احسن تلت شهور في حياتو... تعلم يبتسم ويضحك... أسامة كان نعم الأخ قبل الطبيب عاونو كيفاه يطور علاقاتو خصوصا مع فتون... يمكن كي حكى لي في قلبو الكل خلاه فكل مرة يتحسن... نفسيتو ريحت بعد عذاب طويل...
صح مزال حوايج معرقلين حياتو... وهو شخصيتو اللا مبالية والباردة اما كل شي يجوز والشي الكبير تهنى منو...
سمع عياط فتون حتى لقا روحو رقد على الكرسي.... شوية هكدا حس بحاجة تنوض فيه
لقاها الفرملية
".... موسيو مرتك زيدت الف مبروك تتربا في عزكم نشاله.... تقدر تدخل..."
ناض وتنهد... حل الباب ودخل عليها.. مش عارف كيفاه يتصرف في حالة كيما حالتو.. لقاها راقدة وعرقانة... جبد تليفونو و صورها بش يرسمها مرة خلاف.... حتى سمع صوت البيبي قدامها... خاف وي خاف من طفل صغير حاس بشعور غريب عليه... دور لقا لحمة حمرة صغيرة فالسرير... سمعها تبكي راح هزها طول... بش متنوضهاش... حطت راسها الصغير في رقبتو ويدها اللي على وجهو....
باللقطة هاديك هبطت دمعة تأثر من عينيه.. كيفاه قدر يهرب من ولاد كيما هادو.. ملايكة صغيرة...
فالدقيقة هاديك حلت عينيها... وشافت أجمل حاجة في حياتها... علاء هاز بنتها.... ضحكت وفي عينيها دموع...
شاف معاها لقاها تبكي تبسم بشوية..
"... اعطيني بنتي"
قدم ومدهالها ومازالت تبكي... وحتى بنتها حست بيها وبكات معاها...
".... علاه راكي تبكي درك وش كاين؟؟"
"... يخي قتلي تحب الدموع...."
شاف معاها وضحك.... وهي دهشت فيه...
"... مكانش علابالي بنو عندك سنين.. ههه وتعرف تضحك..."
".... لا عندي سنين... جيست منحبش نضحك برك ههه"
تبسمت معاه ونطقت..
"... كيفاه نسميوها.. ؟؟؟"
".... بنتك نتيا شوفي كيفاه تسميها..."
جرحها بهدرتو... عندو الحق فاللخر هي بنتها مش بنتو... حس بيها زعفت...
"... هي بنتك البيولوجية اما هي بنتي الروحية
.. رح تكون كيما بنتي... مزلت صغير على اللولاد اما وش نديرو مكتوب ربي.. ههه"
ضحكت على هدرتو وباقية تتأمل في بنتها..
"... علاء نحبك ♥️♥️"
حبس قلبو في دقيقة وزاد رجع شوكاتو بهادي الهدرة...
تبسم ونطق بهمس...
".... وانا نكرهك اكتر من اي واحد في حياتو.."
فلول زعفت اما في سع تفكرت بنو لي قدامها علاء.... هو مميز وشخصيتو مميزة واعترافو مميز...
"... عرفت كيفاه راح نسميها..."
شاف معاها باستفسار
"... كيفاه ؟؟"
".... آلاء"
"... من نيتك؟؟"
".... علاه والله يهبل نسميها آلاء وباباها علاء تجيو خارجين لبعضكم...."
هزلها براسو هيه وراح قعد فوق الفوتاي المقابل ليها يراقب فيها فرحان ومبتسم...
الزواج مش باشع بزاف كيما في بالي... نطقها بينو وبين روحو وكمل غفوتو... يمكن راح تكون نهاية لعذابو الطويل؟؟؟ معلاباليش هو علابالو ♥️♥️♥️
أنت تقرأ
كتمان [ مكتملة ]
Short Storyأول قصة ليا وكنت مبتدئة فيها شوية... لكن كتبتها بشغف ...بقلمي أسيل "كتمان....عندما يصبح البوح محرما .." قصة "كِتْمَانْ" قصة رايحة تخرج من كل واحدة فيكم المكبوت، مع شخصية عايشة في عالم صنعتو لروحها، برا تلقاوها كأي شخص عادي، تتصنع السعادة والف...
![كتمان [ مكتملة ]](https://img.wattpad.com/cover/354613214-64-k629921.jpg)