كتمان [ مكتملة ]

الحلقة 7

#كتمان
♣️🖤 الحلقة٧♣️🖤
كان قاعد فوق الطابلة.... وساهي كالعادة... يشرب فالقهوة القاسحة... راسو وجعو ومقدرش يروح يخدم... الوجع قاعد يزيد ويزيد عليه..... وينو الجديد طول عمرو وهو يتوجع وحدو هههه
عدات سمانة..... قدر ينقل كلشي لدارو..... كانت دار صغيرة في آخر ايتاج.... معزولة.... كانت البرودة غالبة على الدار بحكم هو ميحبش السخانة... الأحمر غالب على لون الحيوط.... كانت بيت ليه فيها الا سرير... وبيت خلاف لرسماتو لي تقدر تشم فيها ريحة الموت والدم وكانت دايما مقفولة.....
مقدرش يمشي من الوجاع.... وجهو حمار ويديه يرجفو.... في اللحظة هادي تفكر يماه...

الأم لي مهما منديرو منقدوش نتخلاو على حبنا ليها سوا كانت أم مليحة ولا لا وهو برغم بروده و لا مبالاته معاها مقدرش يكرها فيه... كانت دايما معاه مساندتو وداعمتو... بالرغم لي صرا معاه مقدرش يكرها ولا يحقد عليها.... علابالو هي لي تحس بيه..... مي هو مغلوب على امرو... كان يعيطلها في الليل غير باش يسمع صوتها على الاقل يحس بحنانتها ولو انو حنانتو تلاشات كان متعطش للمشاعر... لي هو مفتقدهم في حياتو...... جامي شفتو واحد سخفان يبكي وسخفان يضحك سخفان يتغشش ويضرب..... سخفان يحس..
المشاعر كلمة متداولة نسمعوها بزاف.... مي منعرفوش قيمتها..... هو كان مفتقدها..... كان حاب يحضن امو ويقولها امي جبت الباك..... حاب يجي يرقد عندها.... حاب يعوض سنوات طفولتو..... مي ميقدرش

يأس من كلشي.... وقاعد يسنى عزرائيل يزورو... علابالو جهنم تسنى فيه..... لا صلاة ولا دعاء دارو ولا مسجد دخلو.. نهايتو مارحش تكون مليحة كيما بدايتو بعد.....

".... أنت ضعيف علابالك... هههه كمل توجع قاعد نحس بالكمال ونتا تتألم هكدا.... حتا قبرك واحد ما رح يدفنك فيه رح تموت هنا وتتدفن هنا..."
"..... اخرج عليا منسحقكش منسحقش نسمع صوتك....."
".... رح تعيطلها... اه روح عيطلها يا ولد مك....
مك هي السبة في حالتك.... يخي تفاهمنا تكرها لازم تكرهم كامل....... ولازم تكرهم فيك... واذا قدرت روح اقتلهم.... "
قاطع حوارو الروحي التليفون يصوني.... كانت امو.... هههههه مشا يزحف علا كرشو مش قادر ينوض حتا.....
".... علاء ولدي.... صفا وش راك علاه مراكش تجي توحشناك ولدي...... "
كان ساكت يسمع فيها.... بلاك رح تكون آخر مرة يسمع صوتها الحنين في ودنو... كمل سمع فيها وهي تهدر على خاوتو وبنت خوه لي كل ما يسمع اسمها وجهو يحمار.... تحكي كأنها طفلة صغيرة....... ومبعد ولات تبكي معا هي حساسة.... على عكس بزاف ناس هو الدموع يعجبوه.... كان يقول دايما بنو الحزن والدموع أعمق من الفرح والابتسامة.... لانو الابتسامة لحظية وسطحية اما الدموع جامي يكدبو....

"... علاء رك تسمع في..... ولدي راك مليح وشبيك تنهج..."
".... يما راني مليح... متخميش عليا...."
"...... اسمع خوك ايهم قرب العرس تاعو... ولازم تحضر.... مديرلناش كيما في عرس معتز وهكداك نشوفوك توحشناك وكامل راهم يسالو عليك...."
"..... يما مانيش جاي..... علابلك منجيش.... وادا على الكادو نبعتلك دراهم ليه ولبنت معتز واعتقيني من الحكاية هادي...... "