كتمان [ مكتملة ]

الحلقة 68

ناض من الرقاد متبسم.... كانت حلمة غريبة وفي نفس الوقت خلاتو يخمم... اذا يجي نهار ويتحقق هاد المنام دوش وراح يشرب قهوة ... لقاها تفطر وعينيها منفوخين... باينة التعب والبكاء...

".... علاء..."
"... طلع عينيه معاها باستغراب... الهرمونات تقلبو كامل...
".... توحشت الياس.... "
تبسم باستهزاء.... وقدم ليها يفحص في وجها..
".... والمطلوب؟؟ "
".... علاء حابة الياس مقدرتش ننساه والله قلبي وجعني... حابة نشوفو مرة اخيرة... مش بيدي هئ هئ.... "
كمل يشرب القهوة بشوية وعقلو خدام.. وينها غيرتو عليها... وينها رجولتو... ماهو حاس بوالو كأنو هي متهموش... كاين راجل يواسي مرتو بحبيبها....
كأنها فاقت على و ش قالت.... هبطت عينيها وغصة في قلبها.... ليومين هادو حاسة بنفسيتها متقلبة...
"....سمحلي والله ما فقت كيفاه قلتها... علاء."
ناض وخلاها.... هي مش رايحة تفهمو.... واحد ما راح يفهمو...

حط لكابيش على راسو ومشا.... كل ما يقول لبرلام لكبير تحل يرجع لنقطة الصفر... حاب يرتاح.... كره من حياتو هادي..

ليوم عندو جلسة مع البسيكولوغ تاعو..... نفسيتو تاعبة... وحاب واحد يحكي معاه...

دخل بلا موعد كي العادة... زادم ولا علابالو.. لقا الطبيب مع طفلة صغيرة يضحكو... في زوج شافوه
".... علاء جيت... درك نخلص مع ليلى ونجيك.
..ولا نقولك ادخل اقعد دقيقه حتى نخلص معاها..."
هزلو براسو وقعد فالجيهة لخرى من الكرسي..
"... ليلى قدرتي توالفي مع مدرستك الجديدة..؟؟"
ضحكت ببراءة...وااحماس باين في عينيها..
".... وي والفت... هاديك الطفلة لي ضحكت على يدي ولات صاحبتي وتصالحنا... وولات تجيب معاها لمجة وتمدلي.... "
تبسم الطبيب وراح حضنها بحنان ابوي...
".....نضن درك تقدري تعيشي حياتك كيما راكي حابة..... اعاقتك جامي رح تكون سبب لي يخليك وحيدة.... ل يضحك عليك اضحكي معاه... نتيا مميزة من عند ربي... حنا كامل عندنا زوج يدين.... نتيا ربي يحبك بزاف ومدلك يد وحدة بش تكوني مختلفة عندو..ويشفو صبرك وإيمانك..."

باستو ف يخدو وناضت من الكرسي تضحك.. خرجت معاه لقات مها وباباها يسناو فيها مبتسمين.... تحسن كبير في حالة بنتهم...
"... خلاص خلصت مهمتي معاها. ولات أحسن متخافوش عليها حاولو دايمين تمدولها ثقة اكثر في نفسها لانو نظن رح تكون انسانة رائعة في المستقبل..... "
".... شكرا دكتور... بنتنا ولات كيما لبنات وولاو عندها صحابات.... مش رايحين ننساولك معروفك معاها..."
ضحك وفرفشلها شعرها...
".... خدمتي مدام وانا فرحان بيها... "
روحو وفي قلوبهم فرح كبير... ليلى خرجت بعزيمة كبيرة تتحدى فيها اعاقتها...

لقاه قاعد لداخل وساهي.. تنهد بشوية ب شيثير انتباهو... لازم يخليه يحبس السهي بزاف...
".... صباح الخير... علاء وش حوالك اليوم.. عندك سمانة مجيتش من اول لقاء بيناتنا.. "
شافو ساكت زاد كمل..
"...علابلك هادي الطفلة أقوى طفلة شفتها في حياتي.... اول يوم جات عندي وتبكي على صحابها وصاحبتها لي يضحكو على يدها لي خسرتها في اكسيدون.... ولات مكتئبة وتحب تموت... ليوم راك شفتها كيفاه ولات... عندها أمل وحلم بش تعيش لانو قدرت حياتها وولات تحبها.... هي مميزة... وانت وش هو الأمل عندك... وش هو هدفك من الحياة علاء.. ؟؟ "
جاوبو ببساطة... وابتسامة تاني..
".... الموت "
".... وش هو لي مخليك عايش قدامي درك.. علاه منتحرتش قبل... وعلاه جيت تتعالج مدام حاب تموت.... "
"... حاب نموت مرتاح بلا حزن ولا كتمان... "

تبسم أسامة وتنهد تنهيدة عميقة... هادي الحالة لي قدامو صعيبة بزاف.. كلشي معقد فيه... "
"... نحبسو هنايا... وش يخليك مرتاح؟؟"
".... نشوف الدم... ونرسم بيه.."
"... نتا تعتبر الدم وسيلة راحة لإخراج المكبوت...."
"... مشكلتك علابلك ويني... الماضي تاعك متشابك مع الحاضر بزاف.... كاين حلقة مفقودة في حياتك... نتا درك 25.سنة... تقدر دير وش ما دارش علاء كي كان في عمرو 6 سنين... "
"... منقدرش.. "
"....علاه متقربش من عايلتك... علاه في عود تقعد تواسيهم في محنتهم هربت وخليتهم يعانيو...بلال خوك مات ومزالو محروقين عليه.. علاه مديتش بلاصتو عندهم... "
"..هما يحبو بلال ميحبونيش انا.. عمرهم ما حبوني.... يحضنو فيا ويهدرو في اسمو.. ويني انا فالحكاية.... وينو علاء لي يحبوه طول عمرهم رح يتفكروني .... ومش رايحين يحوسو عليا ... "